|
|
|
|
|
|
Un rimitu chì, aspessu, avia revelazioni, li disse: "Hè a Vergine Maria chì ti buscherà u sposu di i to sogni". A notte dopu, Maria apparisce à Catalina, tenendu à Ghjesù pè a manu. Li dumanda:
- U voli ?
- Iè chì u vogliu.
- È tù ? dice Maria à Ghjesù.
- Innò. Hè troppu goffa, risponde Ghjesù.
Pianghjendu, Catalina si ne và à truvà u rimitu è li conta u fattu.
- Ùn mi vole! Dice chì sò goffa!
- Ùn hè micca a to persona chì li dispiace, hè a to anima imbuffata d'orgogliu. Lascia fà à mè.
U rimitu li amparò a duttrina, a battizò è a rese umile. Cusì Ghjesù a truvò bella è li messe l'anellu. Fù u famosu matrimoniu misticu di Santa Catalina.
Da tandu, Catalina ùn pensò più chè à raghjunghje u so sposu.
Un ghjornu, l'imperatore Massenziu ghjunghje in Alessandria. Catalina li rimpruvereghja di persecutà i Cristiani è li face a prova chì a so religione era falza. Ùn sapendu risponde, l'imperatore adunisce cinquanta filosufi, i più capaci di a pruvincia. Catalina l'ammutulisce è i cunverte. È cunverte dinù a moglia di Massenziu, l'aiutante di campu è 200 ufficiali. L'imperatore i fece brusgià vivi.
Ghjunta l'ora di a morte di Catalina, unu di i filosufi brusgiati fala da u celu è li cinghje a fronte d'una curona in oru.
Alora, una mascina oribile si avanza nantu à quattru rotule cù spinzoni è seghe chì giranu in sensu cuntrariu. Di Catalina ne face una pappina, racolta da l'anghjuli è purtata nantu à u Sinai.
Catalina, simbulu di libertà, d'independenza, è di tenacità indì a difesa di i diritti di l'omu, hè diventata a santa padrona di l'avucati.
Etimolugia è nomi : Cf Santa Catalina di Siena (29 aprile).
Paesi è cità : Jaen, Magdeburgu, Oppeinheim. In Corsica: Albitreccia.
Prutezzione : filosufi, vechje figlie, sculari, arrutini, mulinari, filatrici...- Catalina d'Alessandria hè a santa patrona di l'avucati bastiacci.
Retrouvez l'émission I Santi sur Voce Nustrale du lundi au samedi à 10h30.
À Clemente l'anu attribuitu una massa di scritti, ma ùn ci hè chè a lettera à i Grechi di Corintu chì ghjè soia. Issa lettera, colma di pietà è di buntà, hè stata scritta per appacià i credenti cù i so preti. Hè a prima volta chì si vede a Chjesa di Roma intervene in l'affari di l'altre Chjese.
Etimolugia : da u lat. "clemens" (dolce, clemente).
Casate : Clementi.
Nomi : Clem, Clémence, Clemens, Clément, Clemente, Clementia, Clémentin, Clementina, Clémentine, Clementius, Clemenzia, Clemmie, Clemmy, Clim, Klemens, Klementine, Klimka.-
U nome feminile Clementina hè statu pupularizatu in i Stati Uniti d'America à l'epica di a cunquista di l'Uveste, cù a canzona "Oh; my derling Clementine".
Paesi è cità : Siviglia, Velletri, Crimea.
In Corsica: Petracurbara, Lanu.
Prutezzione : i zitelli malati.
Vucabulariu : A clementina, u fruttu, porta u nome di un frate, Patre Clemente, chì stava in Algeria, à Misserghin, un paese à 13 km da Oran.
A legenda di Santa Felicità ripete quella di i Maccabei. Dicenu ch'ella era una veduva chì campava à l'epica di l'imperatore Antuninu (138-161), marturiata cù i so sette figlioli dopu à a morte di l'imperatore, per avè ricusatu di rinnegà a fede cristiana. U primu di i figlioli hè mortu frustatu cù un staffile piumbatu, u secondu è u terzu, bastunati, u quartu, lampatu in un ghjargalone, l'altri trè, scapati. Dopu anu tombu a mamma.
Etimolugia è nomi : Cf Filice (12 ferraghju).
Paesi è cità : e Ville di Petrabugnu.
Culumbanu era un frate irlandese natu versu l'annu 540. Passatu in Gallia à l'età di 40 anni, hà fattu u famosu munasteru di Lussoviu (l'attuale Luxeuil, dipartimentu di a Haute-Saône), è po in Italia, à Bobbio, duv'ellu hà fattu u so ultimu munasteru è duv'ellu hè mortu u 23 nuvembre di l'annu 615. Culumbanu era l'amicu di e bestie salvatiche. I scoiattuli si arripiccavanu à a so vistura. I lupi si avvicinavanu per gode di e so carezze. L'orse li purtavanu i so ursachjotti perch'ellu i benedisca. Ma, era terribile cù i so frati. Ùn li lasciava dorme per ubligalli à pregà è, quandu una parulla di i Salmi era mal prununciata, i pigliava à staffilate.
Etimolugia : da u lat. "columba" (culombu).
Casate : Colombani, Colombini, Colombo.
Nomi : Coline, Collie, Colly, Colomba, Colomban, Colombana, Colombano, Colombat, Colombe, Colombi, Colombine, Coulombe, Columba, Culomba, Culumbana, Culumbanu.
Paesi è cità : Bobbio, Irlanda, Luxeuil.
Centu per una chì, dopu à a morte di San Culumbanu, è forse nanzu, certi di i so discepuli sò venuti in Corsica è si sò stabiliti:. nantu à u territoriu di Ruglianu, duv'ellu hè statu fattu dopu u castellu di i Mari;. nantu à quellu di e Ville di Petrabugnu;. in a muntagna di l'Ostriconi, sopra à Lama;. è à a bocca chì permette di passà da u fiuminale di Golu in Balagna.
Litteratura : Mérimée: "Colomba" (1840).
Retrouvez l'émission I Santi sur Voce Nustrale du lundi au samedi à 10h30.
A casa hè diventata a chjesa di Santa Cicilia in Trastevere è u terrenu u cimiteriu San Calistu duve Cicilia hè sepolta accantu à a critta di i papa.
À u seculu sestu, i pelegrini dumandavanu qual'ella era issa Cicilia chì avia u grand'onore di avè a so tomba vicin'à quella di i principi di a Chjesa... ma nimu ne sapia nunda.
Allora anu scrittu una legenda. A santa donna, chì forse era maritata è affigliolata, chì ghjè forse morta indì u so lettu, hè diventata vergine è martira.
Anu dettu ch'ell'era una giovanotta nobile, maritata per forza, morta martira trè ghjorni dopu à u matrimoniu per avè vulsutu cunservà a so virginità. Ma, in trè ghjorni, avia quantunque avutu u tempu di cunverte à u Cristianisimu u maritu, u cugnatu, u boia è quattrucentu pagani.
A legenda dice chì Santa Cicilia-citu-"cantava indì u so core".
È cusì n'anu fattu a patrona di i musicanti. Scultori è pittori l'anu riprisentata tant'è più, generalmente ghjucandu di l'organu è cantandu... o cù una palmula in manu.
U nome cicilia vene da una parulla latina chì vole dì: Cecu.
Etimolugia : da u lat. "caecus" (cecu).
Nomi : Cäcilia, Cecil, Cécile, Cécilia, Cécilie, Cecilio, Cecilius, Cecily, Ceese, Cele, Célia, Célie, Cicilia, Ciciliu, Sheila, Sile, Sileas, Sisile, Sisley, Sissie, Tsilia, Zilge.
Retrouvez l'émission I Santi sur Voce Nustrale du lundi au samedi à 10h30.
A festa di a Prisentazione era celebrata dipoi u seculu XII in a Chjesa greca. L'annu 1372, u papa Gregoriu XI l'hà intrudutta indì a Chjesa latina. In u 1585, Sistu Quintu l'hà stesa à tutta a Cristianità.
A ghjunta di Maria Vergine à u tempiu hè stata riprisentata da parechji pittori, soprattuttu taliani: Giotto, Taddeo Gaddi, Ghirlandaio, Carpaccio, Cima de'Conegliano, u Tiziano, Benvenutu de'Giovanni, Pinturicchio è Signorelli.
U 21 nuvembre si festighjeghja dinù à san Dimitriu, o Demetriu. Hè un santu russiu natu in Ucrania, à Chieve, fattu frate à l'età di 17 anni è mortu vescu di Rostove u 24 nuvembre 1709. Dimitri hè l'autore d'un libru intitulatu "Fior di i Santi" impurtante pè a litteratura russia quant'è pè a religione.
Quand'ellu fù stampatu u primu di i quattru vulumi, l'imperatore Petru Magnu li mandò, in ricumpensa, duie pelliccie di volpe. U patriarca di Mosca ùn pobbe fà di menu chè di dalli a so benedizzione, ma u scrittu di Dimitri, chì parlava di l'Immaculata Cuncezzione è altre teurie rumane, li cunvenia pocu.
Petru Magnu averebbi vulsutu ch'ellu partissi à evangelizà a Siberia ma Demetriu dumandò a grazia d'ùn andà in issi paesi deserti è freddosi duv'ellu ùn ci era biblioteche. U poveru frate ùn era fattu pè girandulà. U so piacè era u studiu è a cuntemplazione. Vedendulu cusì disgraziatu, l'imperatore rinunciò à i so prugetti è u fece vescu di Rostove, una dioccesi duve i preti, stupidi è briaconi, ùn rispettavanu u secretu di a cunfessione è avianu moglie è figlioli ch'ùn sapianu ciò ch'ella era a cumunione.
Demetriu era chjuculettu, magrentinu, mezu zimbu, capellibiondu, cù una barba pinzuta. Troppu bravu, ùn era fattu pè amministrà una dioccesi. Cuntinuvò à scrive, è, in u 1705, publicò u quartu vulume di "Fior di i Santi". Quattru anni dopu, l'anu trovu mortu in dinochje nant'à u so lettu.
Etimolugia : da u gr. "Déméter" (nome di una divinità).
Nomi : Demetre, Demetrio, Demetriu, Demetrius, Dimitri, Dmitri.
Retrouvez l'émission I Santi sur Voce Nustrale du lundi au samedi à 10h30.
I Danesi li pruponenu un trattatu di pace ch'ellu ghjudicheghja inghjustu pè u so paese, pè a so religione, è u ricusa. Allora, u leanu à un arburu, u matraverseghjanu cù e sfrezze, li taglianu u capu ch'elli lampanu ind'un sepalaghju. U capu hè statu ritrovu da i so paisani: Un lupu u curava per ch'ell'ùn sia manghjatu da i corbi.
Sant'Edimondu hè cunnusciutu cum'è amicu di a ghjustizia è di i poveri.
U nome hè d'urigine germanica, è vole di:"prutettore di u patrimoniu".
Etimolugia : da u germ. "ed" (patrimoniu) è "mund" (prutettore).
Nomi : Admeo, Eamon, Edemonda, Edimonda, Edimondu, Edma, Edmé, Edmea, Edmée, Edmond, Edmonda, Edmonde, Edmondo, Edmund, Edmundo, Otmund.
Nanzu, in l'Isula Rossa, u 20 nuvembre celebravanu l'anniversariu di a morte di a veduva Adelaide Savelli, una Terzaria di San Francescu chì avia avutu una vita santa. Era nata u 24 ghjugnu 1829. Hè morta in l'Isula Rossa in u 1899.
Retrouvez l'émission I Santi sur Voce Nustrale du lundi au samedi à 10h30.
L'annu 235, hè statu cundannatu à travaglià inde e minere di Sardegna. Hè mortu da e fatiche trè anni dopu, in l'isula di Tavolara. E so osse sò state purtate in Roma.
U 19 nuvembre si festighjeghja dinù à San Patroculu, natu verdì l'annu 500 in a capitale di i Biturigi (l'attuale cità di Bourges, dipartimentu di u Cher), avia un impiegu in Lutezia (l'attuale Parigi), à a Corte di Childericcu Primu, quandu a mamma, diventata veduva, u fece vene à u paese nativu.
- U mio figliolu - li disse -, ai 40 anni è ghjè tempu chè tù ti marite. T'aghju trovu, cum'è sposa, a più bella zitella di u reghjone.
- O Mà! - rispose Patroculu - lasciemu issa zitella à d'altri è permettimi di realizà a mio vucazione.
Hè andatu à truvà u vescu chì l'hà accettatu cum'è chiericu è po l'hà fattu diacunu. Ma u sughjornu accantu à u so vescu ùn li cunvenia. Ùn pudia pate di calassi à tavula duie volte u ghjornu per fà cullaziò cù a cumunità. Ellu si cuntentava di un pezzu di pane asciuttu è u so piacè era di stà ore è ore incantatu à pregà.
Si n'andò, è piantò in Acque Nere (l'attuale Neris, dipartimentu di l'Allier), fece una casa, un oratoriu è una scola.
Cum'ellu avia a riputazione di guarì stroppii è malati, è chì, di più in più, ghjunghjia ghjente, lasciò tuttu ciò ch'ellu avia à e vergine cunsacrate, è si rifugiò in a furesta di Cella, purtendusi una vanga è una piola à dui tagli. Dece anni dopu, si n'andete più in dà, indì a furesta Culumbaria (l'attuale Colombier), è ci stete 18 anni, sin'à a morte, à l'età di 76 anni. Issi 18 anni sò stati i più belli di a so vita. Ùn stanciava di pregà, ancu quand'ellu vangava u so ortu, o ch'ellu facia a pruvista di legne cù a piola à dui tagli.
Retrouvez l'émission I Santi sur Voce Nustrale du lundi au samedi à 10h30.
Era un famosu predicadore chì hà giratu l'Europa: Paduva, Parigi, Cologna, ecc., for di trè anni, da u 1254 à u 1257, quand'ellu fù pruvinciale di u so Ordine, è dui anni da u 1260 à u 1262, quand'ellu fù vescu di Ratisbona. Insignava chì ùn ci era nisuna oppusizione trà u prugressu di e cunnuscenze umane è a fede cristiana. L'edizione di i scritti di issu gran maestru di a Sculastica cumporta 38 libri. U so megliu elevu hè statu San Tumasgiu d'Aquinu, u più grande teologu di u Medievu.
À u sedecesimu seculu, u celebre Lefèvre d'Etaples, teologu è umanistu, pretendia chì i trè megliu genii di l'umanità eranu: Aristotele, Salomone è Alibertu u Grande.
E vechje cronache pisane parlanu di un Santu Alibertu di Corsica chì campava à u seculu XIII, ma d'ellu ùn si sà nunda è a Chjesa preferisce celebrà a memoria di Santu Alibertu, duttore universale.
Etimolugia : da u germ. "adel" (nobile) è "bert" (spampillante).
Casate : Alberti, Albertini, Albertucci, Albertelli, Albertoni, Albertosi, Aliberti, Alibertini.- In Corsica, in u 1981, Albertini venia à u secondu rangu di e casate, dopu à Casanova. 32% eranu in u cantone di Niolu-Omessa, 15% in quellu di u Viscuvatu, 12% in Bastia è 9% in Corti.
Nomi: Adalbert, Adalberta, Adalberte, Adalbertu, Albert, Alberta, Alberte, Alberti, Albertine, Albertini, Alberto, Albertu, Aliberta, Alibertina, Alibertinu, Alibertu, Aubert, Aubertin, Bela, Bert, Elbert.
Paesi è cità : Calvese (cumuna di Suddacarò).
Prutezzione : Alibertu hè u santu patrone di i scientifichi, naturalisti è chimisti.
Retrouvez l'émission I Santi sur Voce Nustrale du lundi au samedi à 10h30.
Altru ùn si sà. U golfu di "Santa Manza", in fondu di a costa orientale di a Corsica, porta u nome di una cappella Sant'Amanza chì ghjera à un chilometru da u mare. In Petrusella, à 25 km d'Aiacciu, ci hè un paisolu chì si chjama "Santa Manza" per via dinù di una chjesa dedicata à a santa. In Corsica ci era altre chjese cù listessu titulu, in Santu Petru di Tenda, in Ocana, in Appricciani, è una tramezu à Montemaiò è Lunghignanu.
Etimolugia : forse da u lat. "amandus" (à tene caru).
Nomi : Amance, Amand, Amandine, Amanza, Manda, Mandy, Manza.
Stefanu era un Corsu di i Prunelli di Fiumorbu. Frate di San Francescu, hè statu marturiatu in Terra Santa, in u 1391, cù trè cumpagni: Niculaiu di Slavonia, Deudatu di Rodez è Petru di Narbona. Una lettera mandata à i Catalani di Damascu, conta chì i quattru omi sò stati ottu anni in paese musulmanu nanzu di more pè a so fede. Certi frati, più struiti o più sperimentati chè elli, l'avianu fattu un scrittu chì vantava a religione catolica è attaccava quella di Magumettu. Elli, issu scrittu, sò andati à leghjelu davanti à u ghjudice di u lucale. Minacciati di esse tombi, anu ricusatu di rinnegà ciò ch'elli avianu lettu. Dissenu: "Ciò chè no avimu lettu hè ghjustu, santu è catolicu. Simu pronti à subì tutti i strazi è pronti à more". Marturiati durante trè ghjorni, ùn cediinu. Anzi, si ridianu di quelli chì i facianu soffre. Allora, l'anu dati à a folla chì l'hà messi in pezzi, chì hà lampatu i so membri in una brustasgia è spernucciatu e so osse. In u 1889, Roma hà accettatu u cultu di u Slavoniu Niculaiu è, in u 1898, l'hà stesu à l'Ordine franciscanu. Di l'altri ùn si ne parlò. Un decretu di canunizazione hà riparatu issa mancanza è assuciatu i quattru cumpagni.
Etimolugia : da u gr. "stephanos" (curona).
Casate : Stefani, Stefanacci, Stefanaggi, Stefanini, Stephani, Stephanopoli.
Nomi: Esteban, Esteffe, Estevan, Estève, Estienne, Etienne, Etiennette, Staffan, Staines, Steaphan, Steeje, Stefa, Stefaans, Stefan, Stefana, Stefani, Stefano, Stefanu, Steffel, Steffert, Steffie, Stepan, Stepanida, Stepha, Stephan, Stephana, Stéphane, Stephania, Stéphanie, Stephanson, Stephanus, Stephen, Stevana, Steve, Steven, Stevena, Stevenje, Stevenson, Stevie, Stiobban.
Prutezzione Stefanu hè u santu patrone di i funditori, cavapetre è scarpellini.
Retrouvez l'émission I Santi sur Voce Nustrale du lundi au samedi à 10h30.
Quand'ellu fù prete si n'andò da u munasteru duv'ellu stava per campà da riccone, cù panni di lussu, belli cavalli piena a stalla è belle schjave piena a casa. Aspettava ch'ellu murissi "issu vechju scemu di Martinu" - cum'ellu dicia - per piglià u so postu. L'annu 397, Martinu more è Briziu diventa vescu di Turone (l'attuale cità di Tours, in l'Indre-et-Loire). Trenta anni dopu, suspettatu di avè messu incinta una sora, li tocca à scappà per ùn fassi tumbà. Si ne và in Roma, ci stà sette anni, è cunvince u papa ch'ellu era nucente. Rivenutu in a so dioccesi, ci vole à crede ch'ellu ebbe una cundotta assai edificante postu ch'ellu hè statu santificatu. Hè mortu versu l'annu 447.
Etimolugia : da u celticu "brigh" (forza, putenza).
Nomi : Brès, Brice, Bricius, Brictius, Brix, Briz, Briziu, Bryce.
Paesi è cità : Orvieto.
Prutezzione : a pena in corpu.
Diegu hè un spagnolu natu accantu à Siviglia versu l'annu 1400, mortu in a cità andalusa d'Alcala u 12 nuvembre 1453. Era un frate laicu franciscanu, giardinaru, purtinaiu, infirmieru o cucinaru, secondu i bisogni di u cunventu chì l'accuglia. In u 1450, andò in Roma per assiste à a canunizazione di San Bernardinu di Siena. Eranu ghjunti 4000 franciscani, accatastati in un cunventu, quand'ella schjattò una epidemia. Diegu facia da infirmieru. Anu rimarcatu chì e scatule è e buttiglie di medicine ùn viutavanu mai. Diegu disse: "Diu hè più putente chè tutti i medichi è tutti i speziali di Roma aduniti". U so più grande miraculu, Diegu u fece centu anni dopu mortu. In u 1562, un figliolu di Filippu Secondu di Spagna si era sciappatu u capu, caschendu da cavallu. U rè fece apre a tomba di Diegu. U santu omu era cum'è quandu l'avianu sepoltu. Paria ch'ellu durmissi. Anu asciuvatu a so faccia cù un mandile di seta ch'elli anu messu nantu à u capu di u principe, chì guarì. Ghjè, à a dumanda di Filippu Secondu chì u papa, in u 1588, messe à Diegu nantu à l'altari.
Etimolugia, casate è nomi : Cf Ghjacumu (3 maghju).
Retrouvez l'émission I Santi sur Voce Nustrale du lundi au samedi à 10h30.
Saviu, prudente, energicu, Aureliu ebbe à luttà contru à u paganisimu, contru à l'eretichi (Dunatisti, Tertullianisti è Pelasgichi), ma dinù contru à unipochi di i so preti troppu infingardi, è dumandò à Santu Agustinu di scrive un libru contru à i frati sfaccendati è uziosi.
Cù simplicità, muderazione, ma dinù cù assai auturità, hà direttu 36 cuncilii pruvinciali. A so mudestia fece chì lasciava sempre parlà à Santu Agustinu. Hà incaricatu i so preti di annunzià a parulla di Diu è hà istituitu di cantà i Salmi durante a messa.
Serebbi mortu u 20 lugliu di l'annu 430, trè settimane nanzu à Santu Agustinu, dui anni dopu chì i Vandali abbianu occupatu l'Africa.
Etimolugia : forse da u gr. "aurios" (aurora, u fà di u ghjornu), o da u lat. "aureus" (cum'è l'oru).
Nomi : Auleria, Auleriu, Aure, Auré, Aurèle, Aurelia, Aureliano, Aurelianu, Aurélie, Aurélien, Aurélienne, Aurelio, Aureliu, Auriane, Aurica, Auriole, Aurora, Aurore, Avreliane, Orell.
Paesi è cità : E Cannelle, pieve d'Urcinu.
Di Rinatu ùn si sà nunda, for di una legenda. Issa legenda dice chì, un ghjornu, à u seculu quintu, una donna dumandò à San Maurigliu, vescu d'Angers, di falli un figliolu. Maurigliu fece una prighera è, l'annu dopu, nasce un maschju. Sette anni passanu. Una mane, a donna rivene à truvà u vescu mentre ch'ellu era à l'altare, per dilli chì u zitellu si muria. Maurigliu finisce a so messa, pianu pianu, è po parte. Era troppu tardi. Allora, cum'è scimignulitu, scappa in Inghilterra. U cercanu per celu è per terra è ùn u trovanu chè sette anni dopu, in un ortu, in traccia di vangà. U vestenu da vescu è u si portanu. Subitu ghjuntu, Maurigliu và nantu à a tomba di u figliolu... è u vede sorte, in salute. U cunfirmeghja è li dà u nome di Rinatu (natu una seconda volta). U zitellu ingrandò è, à a morte di Maurigliu, u sustituì cum'è vescu d'Angers.
Santu Rinatu fù festighjatu per seculi è seculi ma a fola piace pocu à a Chjesa è, u 12 nuvembre, preferisce celebrà a memoria di u Ghjesuitu René Goupil, sbarcatu à u Canadà in u 1635, appena dopu à Champlain, è tombu da l'Irrocchesi in u 1642.
Etimolugia : u nome Rinatu usa assai, mancu tantu pè i santi chì l'anu purtatu, ma pè u so valore misticu, cù u significatu di "natu à una vita nova per via di u battezimu". In Corsica, in u 1981 venia à u vintesimu rangu di i nomi maschili cù 9 omi nantu à 1000.
Casate : Rinaldi, Linardi.
Nomi: Nata, Rena, Renaat, Renat, Renata, Renate, Renatka, Renato, Renatu, Renatus, René, Renée, Renelle, Rentje, Rinata, Rinatu.
Retrouvez l'émission I Santi sur Voce Nustrale du lundi au samedi à 10h30.
|
|
|
