L'annivesrarii : 3 di Dicembre

12-1835
Dunque ott' anni dopu l'inaugurazione di u ponte stradale di u Vechju, un serviziu di diligenzeera stabilitu trà Aiacciu è Bastia. Una vittura à quattru piazze, tirata da dui è trè cavalli, partia u marti da Bastia, è u sabbatu da Aiacciu, in currispundenza ù a ghjunta di i battelli chì dipoi cinque anni, eranu à vapore. U prezzu di u viaghju, cù dece chilò di bagagli, era di vintisette franchi (ciò chì currispundia à diciottu ghjurnate d'artigianu, o à diciottu decaliti di fasgioli secchi, o settanta sette decalitri di castagne verde, o à trecentu ottanta libri di vinu). Da Aiacciu à Bucugnanu custava sette franchi è mezu, da Bucugnanu à Corti sette franchi è mezu, sei franchi da Corti à Pontenovu, è sei da Pontenovu à Bastia. Di regula, u viaghju durava dui ghjorni, qualchì volta di più. È po, ci vulia à contà cù i banditi, chì tandu brullicavanu, ciò chì face chì certi, omi d'affari pè u più, preferianu piglià u battellu da Bastia à Tulò, è po da Tulò à Aiacciu. A cumpagnia marittima li facia un prezzu di favore : trenta franchi.