Croneca : Rispettu ?

Si sà ch’è u ghjocu à ballò adunisce, fora di tutti i sustenidori, quì è cullandi, millioni di ghjente passiunati. S’è ognunu sustene sempre, ciò chì pare logicu, a so squadra- cù certe volte “cuzzate” à l’altre”- tuttu u mondu si ritrova quandu accade qualcosa di gravu. E ciò chì ci hè statu dumenica ne face parte. A sparizione di Davide Astori (31 anni), capitanu di a Fiorentina, a notte nanzu à un macciu da ghjucà in l’Udinese, hà monda cummossu a ghjente, pocu impreme i sustenidori.


Cum’è, s’è, d’un colpu, omu pigliava cuscenza ch’ellu facia parte d’una sola famiglia. Cum’è s’era persu un amicu, un cumpagnu, un parente. Cusì, tutti i sustenidori taliani, chì d’altronde, anu l’usu d’invettivà è ancu di cercà di manera fisica l’aversariu, si sò aduniti intornu à stu dolu. Una famiglia sola, quella di u ghjocu à ballò. Altercazione, cuntese, picchiglie, tuttu era messu da cantu per lascià piazza à l’umagiu è u rispettu.


C’hè, in issi paesi quì, a morte riprisenta monda in a cuscienza cullettiva. In Auropa, in parechji paesi, un umagiu (braccialu neru) hè statu resu. In Francia dinò...ma di manera individuale : Marseglia, Parrighji, u Red Star, l’ACA è d’altre squadre anu vulsutu sparte u dolu di i Taliani. Li stessu per certi ghjucadori (Verrati, Grenier, Thauvin) o anziani (Lama, Giuly...). Ma, nulla à u nivellu ufficiale. Nè minuta di silenziu, nè braccialu neru, nè sciaccamanate... Ciò chì hà resu azezu Ciprian Tatarusanu, u purtieru di Nantes, nanzu è dopu un macciu di fronte à Marseglia. Stu fattu mostra, s’ellu ci n’era u bisognu, ch’è u rapportu à a morte, ùn hè u li stessu secondu à u locu induve ella si passa.


E s’è noi altri corsi, semu in cumunione cù l’Italia, hè perchè issu rapporta, issa leia facenu parte di a nostra cultura, di a nostra identità. Forse, s’ella era accadutu dui ghjorni nanzu, iss’umagiu era statu resu in Tmizzolu, Mezzavia o Furiani...Forse, dopu, cù un rimproveru di a Lega. In tutti casi, ghjè ella, chì oghje, si piglia una cartulina gialla...U ballò, ùn hè solu un fattu amministrativu, un sportu induve si ghjoca, si vince o si perde.
Sò nanzu à tuttu, omi chì si battenu nantu à un terranu, sò babbi, mariti, figlioli, fratelli è quand’unu sparisce cusì, tutta a famiglia di u ballò perde unu di i soi è li deve rende umagiu...