Livia-Maria Bartoli, un' eroina ordinaria

Ùn sò sola à appreziala, a so voluntà, a so capacità è i so doni sò rimarcati.
Livia-Maria hè passionata, e so passione l'inricchiscenu d'una richezza chì li permette d'avè ghjornate troppu corte, sopratuttu ch'ella si ghjova di u so sapè-fà per trasmettelu è mettelu à u serviziu di l'altri, cù grande generosità.
Dopu una zitellina in paese di Sangavinu Di Fiumorbu, Livia-Maria hà seguitatu i studii in facultà di Corti. Duie licenze in listessu tempu (Corsu, Inglese è Talianu) è un Master IMCA, l'anu datu accessu à un mondu predilettu. Hè entrata in staziu in nu u museu di Corti, ci travaglia sempre è ci face a so carriera.
Tuttu in ella ghjè passione, ié, ma a più tremenda hè quella di a musica chì li permette di suppurtà i momenti difficiuli di l'esistenza.
Prughjetti, Livia-Maria ne hà tanti, cum'è d'utilizà l'arnesi moderni per sparte di rigalu a so sapienza cù l'altri.
Parlendu d'ella stessa, Livia-Maria si dice furtunata d'esse passionata, mentre certi di a so età s'annoianu.
Quand'ella ammenta i strumenti di musica, ne sona dipoi l'età di quatordeci anni, vole testimunià ch'ùn si nasce amparati, ci vole à travaglià, cum'ellu a li cunsiglia Antone Leonelli, caru professore ch'ella ascolta cù devozione, principalmente durante l'attelli di u Centru Culturale Universitariu è di Praticalingua ( partenariatu incù l’associu Mandeo).
Ben chì Livia-Maria ghjochi di mandulina, ghitarra, piano, viulinu ecc., pensa « ch'ell’ūn ci hè micca talentu, ùn ci hè chè travagliu » è stu mottu l'hà fattu soiu.
Trà a musica, u cantu, e lingue, a fotografia, l'informatica, a scrittura d'articuli, a poesia, Livia-Maria ne ferà abbastanza ?
Nò, pensate, hà dinò belle rispunsabilità in l'associu d'Antone Leonelli, Mandeo – Mandulina d’Eri è d’Oghje (valorisazione di a pratica è diffusione di a mandulina in Corsica). Hà ancu creatu un fondu sonore à u so nome in u Museu di a Corsica, in Corti, induv'ella hà dipositatu, cù l'accordu di Bàrnaldu Pazzoni, u Cunservatore di u museu, un lamentu interpretatu da un parente, sessant'anni fà. Hè cusì chì e tradizione si trasmettenu trà ziu à nipote, à prò di a nostra lingua corsa.
Cara Livia-Maria, t'aghju scrittu una poesia un annu fà, ghjè u mo modestu umaggiu intrecciatu d'affettu per lodà ciò chè tù sì, un' eroina ordinaria.
C. C

Aghju scontru una zitella
O cusì bella persona
Li gusta la tarentella
È di mandolina sona
Onore di Cursichella
U so curaggiu vi stona
 
Cumposta di modestia
Di cunduta miritoria
L'aiuta l'eucaristia
Loda lu Diu di gloria
Nasce prestu l'empatia
Per chì scopre a so storia
 
Di l'altri gode a stima
À rende cū devozione
Sì sprime ancu in rima
Sà trasmette l'emozione
In corsu sempre la prima
À sparte le creazione
 
Pregu à Livia-Maria
Un avvene bel' fiuritu
Podè seguità a via
Di u solcu addulcitu
Benedetta ella sia
Pà u so santu meritu.
C. C