i Santi : Santu Vincensiu de'Pauli

Dicenu chì, andendu da Marseglia à Narbona, si hè fattu piglià da i pirati barbareschi. Purtatu schjavu in Tunisi, ci serebbi statu dui anni, fendu cunversioni à a fede catolica. Ma forse chì issa fola hè ellu chì l'hà inventata per fassi bellu. À l'età di 26 anni hè in Roma. Inbavachjeghja un altu funziunariu di u Vaticanu è, in u 1609, u papa u manda in Parigi cù una missione secreta per Arrigu Quartu. Custì, piace à u rè di Francia chì ne face u cappellanu di a so anziana moglia: Marguerite de Valois. Ista volta, l'avia a bella situazione ch'ellu bramava da quand'ellu era zitellu.

Dui anni dopu, cambia di cundotta, si mette à frequentà i poveri, i disgraziati, i sbandunati, è ùn pensa più chè à elli è à u Signore. "Monsieur Vincent" - cum'elli u chjamavanu - diventa u prete u più pupulare di Parigi.

In u 1625, face a Cungregazione di i Preti di a Missione chjamati, più tardi, Lazaristi, incaricati di predicà è di furmà altri preti.

À 43 anni, avia scontru à Louise de Marillac, una donna addisperata di avè persu u maritu è u figliolu. Inseme, si mettenu à u serviziu di i galeriani, di i mezi tonti, di i vechji malati è di i zitelli abbandunati. Per aiutalli, creanu, in u 1633, a Cungregazione di e Sore di a Carità.

Vincensiu hè mortu in Parigi, à 79 anni, u 27 sittembre 1660. Hè statu beatificatu in u 1729 è canunizatu ottu anni dopu.

Etimolugia : da u lat. "vincentius" (chì vince).

Casate : Vincensini, Vincenti, Vincentelli.

Nomi : Cencio, Cente, Centina, Centinus, Kenia, Nencio, Sansan, Sent, Uinsionn, Vicencia, Vicencio, Vicenta, Vicente, Vicentius, Vicenza, Vicenzo, Vikacha, Vikenti, Vikentia, Vin, Vince, Vincensia, Vincensiu, Vincent, Vincente, Vincentius, Vincenz, Vinciane, Vinzene, Zenz, Zenzel.

Paesi è cità : Sartè, Ambiegna, San Daminau, Feringule, Felce d'Alisgiani.
Retrouvez l'émission I Santi sur Voce Nustrale
du lundi au samedi à 10h30.