U cullettivu « Parlemu corsu » rimette a pressione

Addunitu à mezu à centu parsone, qualchì elettu (Mattea Casalta), prufessori di corsu, stitutori, respunsevuli d’associ (Basta à parlà), Micheli Leccia, capifiala di u Cullettivu « Parlemu corsu » era vultatu, duie settimane dopu à l’appuntamentu davanti à u Retturatu, in Aiacciu. Sempre intornu à a rivindicazione di a lingua corsa, ma, sta volta, à mezu à studienti : i trè sindicati di l’Universtà (CGC, GI, GP) ma dinò liceani.
« Semu vultati per fà demustrazioni, chì sta volta, ghjè a ghjuventù di Corsica chì faci a rivindicazioni, spiega Micheli Leccia, micca solu u Culletivu, i studienti o i liceani ma tutti i ghjovani di Corsica. L’ugettivu hè d’uttena l’immersioni tutali di i scoli primarii (da a scola materna à u CM2) è u bislinguisimu tutali in u sicundariu (da a sesta à a tarminali). »
 
Appuntamentu u 23 di marzu in Aiacciu
Per ghjustificà e so idee, u capimachja di u Cullettivu s’hè arrimbatu nantu à ciò ch’elle dicenu e Nazione Unite : « A traversu i lingui, l’aienti participeghjani, micca solu à a so studia, à i so tradizioni, à a so mimoria, à maneri di pinsà è à sprissioni unichi, ma participeghjani ancu à un affari di primura : custruiscini u so avvene…I lingui di u mondu cuntinueghjani par disgrazia, à sparì. Di pettu à issi minaci, a Cunsulta Ginirali di i Nazioni Uniti hà aduttatu una risuluzioni à nantu à i dritti di i populu autottuni, chì faci di l’annu 2019, l’annu intirnaziunali di i lingui autottuni. Vali à dì chì i lingui sò patrimoniu mundiali di l’umanità… »
« Comu hè pussibuli chì un patrimoniu mundiali firmessi insignatu cù un statutu uzziunali ? Femula finita cù l’uzzioni ! »
U Cullettivu vole fà cresce a pressione, chjamendu à una mubilisazione maiò sabbatu u 23 marzu in Aiacciu…