"Trà lu boiu è lu sumere", un cantu natalescu...

Lià  tradizione è religione, eccu ciò ch'è noi truvemu cù stu cantu pocu anzianu chì saria natu dopu à a guerra di u 1939. E parolle chì trattanu di a nascità di Ghjesù in Corsica, portanu una tradizione cristiana arrimbata nantu à una cumpusizione. Di fattu, hè una nanna, genaru musicale chì s'hè mantenutu sin'à d'avà. Era cantata da un certu Paulu Martini in Capicorsu ma, postu chè u cantu mintueghja u Cuscione, si pudaria pinsà ch'ellu piglia e so radiche quallà. Secondu à Cristianu Andreani, chì hà fattu un travaglione nantu à u cantu corsu (primu à avè racoltu issu cantu) saria statu scrittu da un certu Charles Thibault è cumpostu da Francescu Agostini, d'Oletta. Cantatu da Ghjuvan Paulu Martini di u Capicorsu,  hè statu racoltu da Cristianu Andreani cù Maguy Zanni (Cantu di Cirnu). Eppo, registratu per a prima volta ind'u dischettu di "Diana di l'Alba" (prima squadra in u settanta") è un'altra volta cù a squadra attuale (Sumenti d'Acqua in u 1999). U versu hè statu adattatu à modu nostru per mantene un usu natalescu (cetera, pivana, cialamella). E ricerche cuntinueghjanu per truvà d'altre strufatte ch'esisterianu sempre...


Trà lu boiu è lu sumere
Ma guardate lu zitellu
Stesu nantu à la filetta
Si ne dorme cusì bellu
Pare un gigliu dilicatu
Pare fattu à lu pinnellu

Ricantu:
Ninni, nanna, o divinu amore
Cusì bellu è cararellu
Ti feremu una cullana di stelle
Dorme ne la mandria
Cù lu to viculellu
Senza panni, ne la frisculina
U to asinellu ti riscalderà
È la Vergine Maria
Cù San Ghjaseppu, ti viculerà

Purteremu lu Ghjesucciu
In li monti di u Cuscone
Cum'è noi parlerà corsu
È seremu u so pilone
Bierà latte di capra
Manghjerà brocciu è fiadone 

Ricantu