Corse Net Infos - Pure player corse

Lingua Corsa : arradicà si à a prima zitellina per un sviluppu più forte à longu andà


Rédigé par Vincent Marcelli le Mercredi 12 Décembre 2018 à 20:12

Eletti, respunsevuli di a lingua corsa è di e ciucciaghje s’eranu adduniti issu dopu meziornu in a ciucciaghja di a CAF, in u quartieru di i Salini, per fà u puntu nantu à a situatione di a lingua corsa in e ciucciaghje. Un primu passu, quellu d’un’arradichera più forte à l’iniziu di u sviluppu linguisticu, per, à longu andà, sulcà megliu, l’amparera di a lingua. Cù u scopu di fà ne « a lingua di u pane ». Vale à dì, parlata in a sucetà…




Photos Michel Luccioni
Photos Michel Luccioni
Saveriu Luciani, cunsiglieru esecutivu in carica di a lingua corsa, Vannina Buresi, cunsigliera territuriale, presidente di a cummissione AD HOC incaricata di a riflessione in giru à e pulitiche publiche di a lingua, Pasquale Ottavi, incaricatu di missione per a lingua corsa à a CdC, Bernardu Ferrari, direttore di u serviziu lingua corsa, accumpagnati da Mariadumenica Predali (chì riprensitava u Canopè di Corsica), Stefanu Conca (respunsevule di u scagnu di a lingua corsa in Aiacciu) è Monica Santoni, cuurdinatrice LCC i e ciucciaghje si sò addunite issu dopu meziornu in a ciucciaghja di a CAF. Una reunione chì, di fattu, era un ritornu di sperienza dopu à azzione di a Cullettività. Una manera, à tempu, di fà u puntu nantu à tutti l’arnesi messi in piazza, è vede di chè manera s’adopra a lingua corsa in e ciucciaghje.
« Ci  semu dighjà adduniti trè volte incù a cummissione, spiega Vanninna Buresi, u scopu hè d’arrimbà si à u travagliu fattu da Saveriu Luciani è di vene in aiutu nantu à ciò chì pudia mancà. In un prima tempu, avemu cercatu à fà u puntu nantu à a manera di tramandà a lingua in tutti i dumunii chì sò fora di a scola è chì tocca, nanzu à tuttu, a prima zitellina è tuttu ciò chì hè educativu. »
Tandu, in a matinata, l’eletti anu invitatu duie direttrice di ciucciaghje d’Aiacciu è Bastia, per fà u puntu nantu à a so manera di travaglià intornu à a tramandera di a lingua. I servizii di a lingua corsa di a merria d’Aiacciu (cristofanu Mondoloni, Stefanu Conca…) eranu dinò invitati. Una manera, sta volta, di misurà a messa in piazza di a strategia di diffusione di la lingua…
U dopu meziornu, a visita s’hè fatta ind’una ciucciaghja ch’ùn era micca municipale, quella di a CAF. « Per vede a so manera di travaglià. Avemu vistu, per indettu, ch’elli t’anu prublemi di furmazione. Masimu chè e parsone capace à fà issa tramandera sò anziane è vicine da a retirata. Tuttu què ci hà da permette di travaglià intornu issi prublemi. »

 

I resultati s’aspettanu
L’azzione di a CdC ùn sò chè à l’iniziu per ciò chì tocca à a lingua corsa. « Ne vulemu fà a lingua di u pane, spiega per contu soiu, Saveriu Luciani, ma tuttu què dumanda tempu. Ghjè per quessu ch’è no vulemu, nanzu à tuttu, fà u puntu nantu à a situazione di a lingua. Avemu da principià cù a zitellina è passà, dopu à l’insignamentu è, à pocu à pocu, tutti i duminii cuncernati. »
Per l’elettu, a Cullettività face monda à prò di a lingua corsa ma, i resultati s’aspettanu sempre. « Ci vole à fà megliu. A ghjente aspetta assai…ma face pocu. Ci vole à piglià si in manu. Diciaraghju, à l’usu di JFK, « Ùn dumandate micca à a lingua (dunque à l’omi) ciò ch’ella  pò fà per voi, dumandatevi ciò ch’è vo pudete fà per a lingua… »
Una strategia à longu andà…




Livres | Musique | Evènements | Lingua corsa | Cuisine














Newsletter




Galerie
Galeani
Galeani
Nettoyage Sanguinaires
Nettoyage Sanguinaires
Recyclerie de Corse
Recyclerie de Corse
Calvi : Défilé de mode des commerçants
Calvi : Défilé de mode des commerçants
Logements sociaux à Budiccioni
Logements sociaux à Budiccioni
Incendie appartement Ajaccio
Incendie appartement Ajacci
Premier bain de l'année à L'Ile-Rousse
Animations de Noël à Porto-Vecchio
Clean walk à Ajaccio
Messe de Noël à Castellucio