L'anniversarii : 23 di Maghju

06-1977
In Kyrn Ghjacumu Thiers, chì ghjè prufessore à l'Università di Corsica, principiava una cronaca in lingua corsa intitulata : "L'Accorta". Frà altre cose, parlava di e donne chì travagliavanu in e piluccherie per omi, fattu piuttostu raru à l'epica. Dicia : "Entrite : ci hè ! V'aspetta in un vapore di musica dolce è vi stà à boccarisa. Vi face pusà, v'alliscia u capu cù e so mani fine è … u vi lava. Oramai e donne anu a manu in logni locu. È un pede in e buttee di i piluccheri. Ùn hè tantu, quella mamma ghjunta per curà ch'elli tagliessinu bella corta a chjoma di u so sbarazzinu di figliolu ; o allora, a moglia di u patrone, per arripone u saccu di a spesa. Ma avà ùn simu à chjechjera, chì sò elle e vere patrone di u locu. Danu una pulita trà i sedioni, porghjenu pettini, asciuvadori, spazzulette, schizzetti è spechji à à piluccheru ma cù un gherbu… cù una manera !… I taccheri ùn si n'anderebbinu più : "tagliate torna una cria…". Fattu finu chì unu, l'altr'eri, è taglia è taglia, anc'à pena e ci surtia pilatu cum'un ovu. Ch'elle ci sianu in a buttea di u piluccheru, ultima furtezza di u maschilisimu anticu, nimu si n'hè lagnatu. Ci serà forse di più silenziu, di menu sciamulate, ma qual'hè chì hà da tene in pettu à e grazie feminile ? È s'elle buscanu qualchì parulla in corsu, serebbi un incantu