I Santi : Santu Vitale è Santa Valeria, Santu Petru Maria

Vitale fù dinunciatu da un prete di u cultu paganu di u diu Appollu. U messenu in fondu di una cisterna è li lamponu petre addossu. Hè mortu pianu pianu, stuffulatu. Dicenu chì, quand'ellu spirava, intesenu e stride. Era u prete chì l'avia dinunciatu chì suffria pene murtale.

Valeria piense u maritu è partì da Ravenna per stabilissi in Milanu. Un ghjornu, in carrughju, a so calescia fù arrestata da un attruppamentu. Eranu quelli chì aduravanu è festighjavanu u diu di e fureste, Silvanu. Anu ricunnusciutu a veduva di Vitale, l'anu battuta, l'anu tantu straziata è ferita, chì u lindumane era morta.

Etimolugia : da a casata latina "Vitalis", da "vita" [sopranaturale]. Per Valeria, V. Valeriu (9 dicembre).

Casate : Vitali, Vitani.

Petru Maria Chanel era un missiunariu natu in u 1803, à Cuet, dipartimentu di l'Ain. Era prete di a piccula parochja di Crozet quand'ellu decise di fassi frate maristu, issi frati bianchi cunsacrati à a Vergine Maria, è di parte per una missione d'evangelizazione.

L'anu mandatu in l'isula melanesiana di Futtuna. Oghje, issa isula, è l'archipelagu di Wallis, formanu un territoriu francese oltremare. Tandu, Futtuna avia un millaiu d'abitanti è ghjera guvernata da u rè Niulicchì.

Subitu, Petru Maria hè statu ben accoltu da u rè è u so cunsigliu ma, cum'ellu insistia per cunverteli à a religione cristiana, l'anu dettu di andassine è, cum'ellu ricusava di parte, l'anu tombu à bastunate. Era u 28 aprile di l'annu 1841. Petru Maria avia 38 anni.

Etimolugia : V. Petru (29 ghjugnu).