I sculari di Belgudè anu principiatu una simana fistiva chì mette a lingua corsa à l'onore. À tempu, ricevenu dinò i s'amichi taliani, di a cità di Seggiano.
"Issu scontru cù i zitelli di Seggiano chì si face dipò parechj'anni oghje mentre a simana di a festa di a lingua, hè unu scontru aurupeu. Sò classe di corsi mezani di prima è sicond'annata" spieche Éric Beretti, u direttore di a scola.
Dop'à una visita di a parte sculare di u castellu Malaspina, in presenza di l'inspetrice di l'educazione naziunale Cécilia Stefani, tutti zitelli, anu accoltu in musica, parenti è paisani, in a corte di a scola, cù a participazione dinò di l'invitati taliani, per e canzone Libertà di e Cardelline è a puesia di Petru Dieghi.
" A meziornu, avemu spartu un ripastu corsu è dopu avemu visitatu u paese di Belgudè ".
Un prugramma riccu di spartera è d'amparera chì cuntinueghje mentre tutt'a simana cù parechje visite. Dumane, marti, i zitelli andaranu à scopre u paese d'Oci marcuri, u museu è a cità bastiaccia è per compie, u rughjone di L'ostriconi, cù i so pagliaghji, a so aghja è u so paisolu abandunatu per u ghjovi.
Di u latu di a cumuna di Belgudè, anu vulsutu mette in vallu u prugramma di a festa di a lingua cun trè appuntamenti.
" Oghje, u 13 di maghju, in scola cù l'amichi tuscani, u 21 cù u teatru di Marianna Nativi, Fiamullina è u so missiavu è u 1mu di ghjunghju, cù a visita di u paese in immersione cù e scole di u Greta, cù u guida Louis Belgodere " priciseghje Marie-Claire Ceccaldi, aghjunta in merria, nanzu di compie, " Saveriu Luciani hà dettu chì "a festa di a Lingua hè divintata un usu ma esiste una brama". Una brama chì si scopre ogni ghjornu è nimu ùn la pò parà".
Envoyer à un ami
Version imprimable
