A cullettività vole sustene i cummerci di u centru d'Aiacciu

E difficultà sò maiò per tutti i cummercianti di u centru di a cità, certi chjodenu e so porte, d'altri, riescienu à mantenesi ma diventa di più in più difficiule di sviluppà una vera dinamica ecunomica.

Cuscente di a situazione, Ghjuvan Cristofanu Angelini hà rispostu à sta dumanda assicurendu u sustegnu, à cortu andà, di a Culletività. Cusì, una reunione serà urganizata da quì à pocu (forse nanzu à a prussima sessione).

Si trattaria di mette in piazza, cù tutti l'attori cuncernati (Cdc, Cità d'Aiacciu, CAPA, associ di cummercianti) una strategia di manera à permette u sviluppu cummerciale in cità d'Aiacciu. Primurosu di a necessità d'agisce prestu, u presidente di l'ADEC dumanda una cuurdinazione maiò trà tutti. Ma i sforsi  seranu fatti in u quadru di e cumpetenze di a Cullettività è micca aldilà.

Da u so cantu, Marina Fondacci, presidente di a Federazione di i cummercianti di u centru d'Aiacciu, prisente cù una decina di persone, hè stata appena dillusa, aspettendu di più chè a pruposta di Ghjuvan Cristofanu Angelini. Ma u fattu maiò d'issa dumanda à mezu à l'eletti corsi, permetterà, forse, di fà avanzà sta cartulare.