Corse Net Infos - Pure player corse

8 di marzu : In u 1755 Pasquale Paoli dava a pussibilità à e donne di vutà !


Maria-Serena Volpei-Aliotti le Vendredi 8 Mars 2019 à 18:25

L'8 di marzu, ghjurnata internaziunale di i diritti di e donne, hè uffizializata da L'ONU in u 1977. Mà in u 2019, parchè si ferma solu à un ghjornu ?



L'ottu di marzu, hè celebrata a ghjurnata internaziunale di i diritti di e donne. Micca a festa di e donne, ch'ella sia chjara ! Sè certi ( omi è donne) pensanu chì ghjè una festa cum'è si pò festighjà a musica, i fiori o ancu l'innamurati. Sapete calcosa d'effemeru. Mà ùn hè manc'appena quessa !   
Allora iè, mentre quella ghjurnata si sente " bona festa " o diverse cacciate annant'à l'incumbenze casagnere per quelli chì sò i più macagnosi, mà ci n'hè sempre certi, i più arritrati, chì pensanu chì nittà una casa, stirà i panni, priparà da manghjà o altre, sò affari fatti ò chì si ponu fà solu da è donne, ammintendu u guida di a donna parfetta in l'annate 50, induve a donna era cunsiderata cum'è un oggettu.  


Pover'à noi.(https://www.google.fr/amp/s/amp.terrafemina.com/article/le-guide-de-la-parfaite-femme-au-foyer-dans-les-annees-50_a311198/1)  
Mà di fatti, realmente, stu ghjornu, cusì cortu ch'ellu sia, hè una data di mubilisazione per l'ugualità trà omi è donne, un bilanciu mundiale di a situazione di e donne attraversu i so paesi. Una parità chì sarebbe in ogni duminii ! Un'equivalenza nurmale chì pare ancu puru oghje, à a nostr'epica, difficiule da capisce per certi!  


Tandu, in u 1755, 264 anni fà dunque, in Corsica, Pasquale Paoli hè elettu generale di a Nazione Corsa. Mà chì ghjè u rapportu quì cù e donne è l'ugualità mi dicerete?
Hè chì Paoli, in avanza cù u so tempu (vale forse ancu per oghje...) dava tandu a pussibilità à e donne di vutà. Era scrittu chì, i cittadini di più di 25 anni, ancu e donne chì duvianu esse veduve o celibatarie avianu u dirittu di vutà ( ghjera un bon principiu).   
In Francia, u dirittu di votu per e donne sarà per u 29 d'aprile 1945. 190 anni dopu à a Custituzione di Paoli.