Corse Net Infos - Pure player corse


Ritornu di u fretu in fine di settimana : i vinaghjoli corsi pinserosi


Pierre-Manuel Pescetti le Vendredi 1 Avril 2022 à 10:09

Dopu à qualchì ghjornu di caldu è di sole in sta fine di marzu, u fretu vulterà in Corsica in i primi ghjorni d’aprile. Una situazione periculosa per i vignaghjoli corsi. Tenenu sempre in mente u fretu di l’annu scorsu à listessa epica induve a vigna di certi rughjoni di l’isula avia suffertu assai di u cotru in piena stagione di fiuritura.



In u 2021, un ettaru di e vigne di Ghjuvan Battistu De Peretti Della Rocca era statu brusgiatu da u cotru. Ritrattu : Ghjuvan Battistu De Peretti Della Rocca
In u 2021, un ettaru di e vigne di Ghjuvan Battistu De Peretti Della Rocca era statu brusgiatu da u cotru. Ritrattu : Ghjuvan Battistu De Peretti Della Rocca
Francescu Franceschi, fighjola e so vigne. U vignaghjolu di u Cismonte, d’altronde, secondu presidente di a cuuperative viticola UVIB d’Aleria lampa un sguardu primurosu nantu à i primi fiori di e so vigne. « Spergu chè tuttu si passerà bè sta volta, micca cum’è l’annu scorsu.»
 
Leghje dinù : Vague de froid en approche sur la Corse pour la fin de semaine

Cum’è in u 2021, à listess’epica, un colpu di fretu hè privistu in fine di settimana in Corsica, à partesi di stu sabbatu è per trè ghjorni.
È cum’è l’annu scorsu, stu fretu affacca dopu à qualchì ghjornu di sole è di caldu chì anu datu à e vigne, i primi segni di u Veranu è di a fiuritura. Ancu s’ell’ùn hè statu toccu da u cotru in u 2021, Francescu Franceschi s’inchieta per l’altri vignaghjoli : « Sopratuttu per quelli di u Nebbiu è di Figari, dui rughjoni assai sensibili à u cotru. Certi anu persu guasgi a metà di e so racolte l’annu scorsu ».

Una lotta artisgianale contru à u cotru

Ghjuvan Battistu De Peretti Della Rocca, vinaghjolu in Figari, s’arricorda d’issu mumentu. « Aghju persu un ettaru sanu in u 2021, fù brusgiatu da u cotru.» Sò poche e soluzione per luttà contr’à stu fenomenu di fretu d’aprile, ma u vinaghjolu hà scambiatu appena a so manera di travaglià. « A tagliatura di certi uvizzi hè stata fatta apposta in ritardu. In casu di cotru forte, ci sò sempre candele o pudemu brusgià appena di fenu sottu à e vigne ma eu, ùn ci credu micca », spiega Ghjuvan Battistu De Peretti Della Rocca. 

Leghje dinù : Gel : jusqu'à 60% de pertes dans le vignoble de Corse
 
D’altre soluzione esistenu per riscaldà appena l’aria. « Ci sò e torre incù l’elice ma cù una timperatura di menu 2 gradi, ùn ghjova à nunda è sò troppu care », aghjusta Francescu Franceschi. Di pettu à u fretu, i vinaghjoli devenu esse primurosi di e so vigne per prutege le, guasgi di manera artisgianale. « Basta una sola notte da sott’à zeru gradi per arruvinà una racolta sana », ghjustificheghja u vignaghjolu. 

Ancu s’è e vigne, ùn morenu micca, u periculu hè finanziariu.  In u 2021, i vinaghjoli chì avianu persu più di 30 % di a so pruduzzione pudianu dumandà d’esse ricunnisciuti in tantu chè vittimi di catastrofa agricula. U Statu avia privistu un aiutu finanziariu. 
Ùn hè micca a prima volta chè i vinaghjoli corsi sò tocchi da u cotru  ma certi sò pinserosi da u caratteru regulare di stu fenomenu. « Ghjè u segnu ch’ùn ci vole à parlà di riscaldamentu climaticu ma piuttostu di sregulamentu climaticu ! », finisce Francescu Franceschi. 
 

 

















Les Vidéos de CNI


Newsletter


Galerie
Manif Ajaccio.12
Manif Ajaccio.11
Parking Gaudin
Parking Gaudin
Cinéma Ellipse
Cinéma Ellipse
IMG_9423
Donation Lazaret ajaccio.5
1
Inondations Ajaccio.17
Soignants Bastia
Hôpital Ajaccio
Inhumation Guy Bedos
IMG_9304
Citadelle Ajaccio.12
IMG_2047