Secondu cuncorsu "Aiò discurrimu" in Aiacciu: sedeci sculari per prumove a lingua corsa

Mette zitelli in situazione di parlà in corsu trà elli nantu à una tematica precisa, eccu u scopu di u cuncorsu "Aiò discurrimu" messu in piazza l'annu scorsu da Mariantonia Salini cunsigliera pedagogica. Una riesciuta maiò per una manifestazione chì face, à pocu à pocu, a so strada. Issu mercuri, eranu sedeci CM1 ghjunti da tredeci classe d'Aiacciu è u circondu (Mezana, Appietu, Pietralba, Veru, Sarrula, scola Charles Bonafedi, Cuttuli, Salini sei, scola Simone Veil) per cuntrastà. In tuttu, sette classe "tradiziunale" è sei bislingue per deci sculari "tradiziunali" è sei bislingui. E tematiche scelte questu annu eranu per i primi, a scola, è per i sicondi, un pranzu famigliale. Si tratta dunque, di travaglià tuttu l'annu intornu una dodecina di situazione specifiche (un ripastu intornu à una ceremonia, in u usteria..., un zitellu chì ghjunghje in ritardu à a scola, un altru chì hà persu u so stucciu..."Anu travagliatu e tematiche cù i so insignanti, spiega Mariantonian Salini, hè l'occasione di metteli in situazione naturale ch'elli pudiarianu aduprà in i vita d'ogni ghjornu. "
Cusì, i zitelli anu passatu una meza ghjurnata in i scagni di l'ispezzione d'academia per participà à l'edizione 2019. In dui, i sculari, sò passati per cuntrastà davanti à una ghjuria ( Dumenica Susini, ispettrice d'academia, Mariantonia Salini cunsigliera pedagogica è Battestine Delplanque, insignante...) durante cinque minute. Sò stati valutati cù criteri specifichi cum'è a pruduzzione urale, a ricchezza di u lessicu, l'accentu...Dopu à i resultati, tuttu u mondu s'hè ritruvatu per una visparina intornu à un mument di spartera. "U cuncorsu permette di misurà u nivellu di tutti i zitelli, aghjusta Mariantonia Salini, tuttu u mondu s'hè impegnatu bè è l'edizione 2019 hà messu in vale a crescenza di a manifestazione. "
I trè primi d'ogni categuria anu ricivutu una cuppa è un diploma per u prima. Tutti anu avutu un porta chjave per ricurdà si d'issu bellu mumentu...
I resultati
Trafila tradiziunale:
1 Ghjuvan Cameddu Cortichiato (Cuttuli)
2 Quentin Obo (Pietralba)
3 Lesia Capriola (Appietu)

Trafila bislingua:
1 Paulu Antò Poggi (Mezana)
2 Lucas Magar (Mezana)
3 Sara Sifi (scola Simone Veil)