Daniele, surpresu in traccia di pregà, fù lampatu mezu à i leoni.
Dariu passò a notte senza cena è senza dorme.
A mane, à l'alba, si spicciò di andà à a fossa di i leoni, chjamendu à Daniele cù voce dulurosa.
Daniele ùn era micca mortu. I leoni ùn l'avianu mancu toccu. Disse: "O Rè, posse tù campà in perpetuu! U mio Diu hà mandatu un anghjulu chì hà tuppatu a bocca à i leoni, per via chì sò statu ghjustu cun ellu è ghjustu cù tè".
Dariu si rallegrò, fece caccià à Daniele da a fossa è ci messe quelli chì l'avianu incausatu, è so moglie, è i so figlioli.
È po, à tutti i populi è nazioni, mandò lettere chì dicianu: "Chì a vostra pace cresci. Ugnunu deve riverì u Diu di Daniele chì face miraculi in celu è in terra".
Etimolugia ; da u gr. "dôron" (rigalu).
Casate : Dari, Dary.
Nomi : Cf Isidoru (4 aprile).
Urbanu Quintu (Guglielmu di Grimoald), papa da u 1362 à u 1370, era natu l'annu 1310 in Grisaccu, un paese di l'attuale dipartimentu di a Lozère. Fù u settesimu papa à stà in Avignone.
In u 1367 si ne era andatu in Roma. Ci stete dui anni è mezu. U 17 aprile 1370, vultava in Avignone. Santa Brigida (Cf u 23 lugliu) ùn vulia è li disse chì s'ellu partia, avia più pocu à campà. È di fatti, nove mesi dopu, u 19 dicembre muria. Ùn volse spirà in u palazzu di i papa è si fece purtà in una casa mudesta dicendu di lascià a porta aperta per chì a ghjente veghi chì un papa era capace di more in bon cristianu.
Etimolugia : da u lat. "urbanus" (urbanu).
Casate : Urbani.
Nomi : Bahn, Bahne, Bahnes, Bohn, Urb, Urbain, Urbaine, Urban, Urbana, Urbane, Urbanilla, Urbano, Urbanu, Urbanus, Urbas, Urbice.
Retrouvez l'émission I Santi sur Voce Nustrale du lundi au samedi à 10h30.
Envoyer à un ami
Version imprimable
