A seconda edizione di i stati generali di e fiere è mercati di Corsica hè u 21 di ghjunghju in Corti

U 21 di ghjunghju, à l'università Pasquale Paoli, a FRRAAC è i so soci urganiseghjanu a siconda edizione di i stati generali di e fiere è mercati di Corsica. In prisenza di parechji intervinenti, sta riunione s'avvenerà mentre tutt'a ghjurnata, seguitendu un riccu prugramma. 

" I primi stati generali si sò fatti in u 2012.  Eranu fucalizati elli  annant'à l'arricata di e fiere indè a custruzzione di u riaquistu. L'accumpagnu di e filiere di pruduzzione, di l'attività è tant'altri. I sicondi stati generali, sò urientati elle versu u labellu Fiere di Corsica chì s'hè cunfurtati dipò  "spieca Jean-Michel Sorba

U scopu di quella ghjurnata cum'è a ramentanu l'urganizadori, ghjè d'identificà è furmalizà l'arricate pussibile di i mercati di vicinanza à a transizione ecunomica sociocultural è ambientale.  

" Oghje, apre un mercatu ghjè un attu puliticu. I mercati sò lochi di sviluppu lucale, chì ponu rende pussibile a vita di i pruduttore è di i cunsumadori chì anu persu cunfidenza indè ciò ch'elli manghjanu. Sò pali strasurdinarii per fà a pulitica". 

Dop'à l'accogliu di i participanti, à partesi di 9ore, una prima parte sarà cunsacrata à a prisentazione è à l'urganisazione di e fiere è i mercati. À 10o45, tutti participaranu à l'attelli pruposti. Unu annant'à l'ecunumia è l'imbusche ambientale, un'antru annant'à i tarritorii è e nove imbusche è l'ultimu, i sapè fà è l'amparere per nove cumpetenze. 

In principiu di u dopu meziornu, una sintesi di l'attelli sarà seguitata da una tavula tondula. Per compie à ghjurnata, un dibattitu generale annant'à u tema di i mercati di vicinanza, incù à participazione anzituttu di Jean-Félix Acquaviva.