Umagiu à Manu Cester

Ùn hè, à dilla franca, cusì faciule di rende umagiu à qualchissia ch’e n’avemu cunnisciutu. Cun quale avemu spertutu qualchì serata…Eppuru, iss’umagiu quì, ci vole à rendelu. Ch’è u nostru amicu Manu Cester, u merita cù ciò ch’ellu hà campatu, à mezu à soi, amichi, famiglia, studienti, cumpagni di strada studientina, di scola o liceu, di fede religiosa è spirituale.

Quale hè ch’ùn cunniscia à Manu ? In Bunifaziu induv’ellu era cunfratellu, in Corscia o in Lama induv’ellu avia e so radiche, in Aiacciu induv’ellu avia passatu a so ghjuventù in u quartieru di u tribunale (un segnu per quellu chì fù, qualchì tempu, avucatu), in ecchisi per quelli  studii d’avucatu, in Corti à l’Università. Una vita –corta- à aiutà, tarruccà, ride à mezu à tutti quelli ch’ellu tenia caru.


Religione, suciale, pulitica, spiritualità, i duminii di u so impegnu ùn mancavanu micca. Eppuru, ùn avia mancu cinquant’anni. Manu era dinò sopratuttu, una manera particulare è ancu naturale, di sprimasi chì facia parte di u so estru. Di quelle parsone ch’ùn passanu mai senza lascià una « traccia » cù i so ghjesti, e so macagne. Una dispusizione è una capacità naturale à fà ride a ghjente. Ma dinò è à tempu, u core in manu. Sempre prontu à aiutà mettendu da cantu i so prublemi parsunali. Senza sminticà ne mancu l’amore ch’ellu purtava à a so terra. Crudele destinu, ghjè a so terra ch’u s’hè pigliatu issu ghjornu di ghjugnu nantu à a scala di Santa Regina. Vicinu à Corscia induv’ellu era fieru d’avè compru una vechja casa per vultà à campà in muntagna.


Averà forse, truvatu, à mezu à ella, u silenziu eternu. Per noi tutti, ch’avemu avutu a furtuna di sparte cun ellu, qualchì mumentu, u so ricordu serà sempre sculpitu ind’i nostri cori….