Corse Net Infos - Pure player corse

U cullettivu « Diversità faci ricchezza » vole fà a so strada


Rédigé par Vincenzu Marcelli le Samedi 1 Septembre 2018 à 16:41 | Modifié le Samedi 1 Septembre 2018 - 17:08


Chjamatu da u so capifilu, Mariu Sepulcre, u cullettivu « diversità faci ricchezza » urganizava, issu mercuri nantu à a piazza Foch in Aghjacciu, una mostra cù 25 artisti prufessiunali o amatori. L’occasione, per issa squadra, di francà un passu ver di u so sviluppu…


Mario Sepulcre è Jean Marc Idir (Foto J.-P. Tralonca)
Mario Sepulcre è Jean Marc Idir (Foto J.-P. Tralonca)
A l’iniziu, ci era un’azzione d’aprile scorsu, da Mariu Sepulcre, u famosu pittore per palisà un mancu. Quellu di tutti l’artisti è masimu quelli chì t’anu pocu piazza in Corsica per fà a prumuzione di u so arte. Qualchì tempu dopu, di maghju, nascia u cullettivu « Diversità faci ricchezza » un nome datu da Marie-Julie Ferrandi. E subbitu in giru à u pittore, quaranta artisti, a maiò parte intornu à l’arti plastichi. A manifestazione d’oghje, nantu à a piazza Foch d’Aghjacciu si scrive, d’una certa manera, in a cuntinuità. Vinticinque artisti si sò aduniti per fà ghjustapuntu a prumzione di u so arte. Cù trè arti messi in vale : a pittura, a scultura è a fottografia. E in tuttu, centu opare prisintate à u publicu. « Ci hè statu assai mondu, spiega Mariu Sepulcre, semu felici d’iss’adunita chì hè, da veru, una riesciuta. Dà a vulintà à tuttu u mondu di cuntinuà nantu à u li stessu filu. »


Un’adunita più larga di settembre in Corti
L’artisti anu prisintatu u so travagliu da 16.00 à 23.00, anu avutu, di sicuru, l’accordu di a municipalità. Una manifestazione ch’ùn saria ch’un passu. « U scopu hè d’andà monda più luntanu. Ci vole à dà a pussibilità à tutti l’artisti di pudè sprime u so arte. Ciò ch’ùn si face micca tantu oghje. Avemu avutu u sustegnu di a Cullettività. U presidente di l’Assemblea, Jean-Guy Talamoni è Josepha Giacometti, cunsigliera esecutiva incaricata di a cultura sò pronti à aiutà ci. »
L’idee ùn mancanu micca. E cum’ella dice a parolla scelta oghje « arti chjocchi », u culletivu si vole sviluppà. Una reunione hè privista à a fine di settembre in Corti cù d’altri artisti di u Cismonte sta volta, una mostra seguiterà nanzu à a fine di l’annu à l’aeroportu d’Aghjacciu. Per un filu artisticu chì conta di fà a so strada à longu andà…



Livres | Musique | Evènements | Lingua corsa | Cuisine