Corse Net Infos - Pure player corse

Mondu scemu in Merusaglia per issu Prete chì si n'hè andatu


Rédigé par Maria-Serena Volpei-Aliotti le Lundi 5 Novembre 2018 à 21:43 | Modifié le Lundi 5 Novembre 2018 - 22:17


U prete Mondoloni chì s'hè spentu vennari a 79 anni, hà fattu u so ultimu viaghju versu u so diu luni in u so paese di Merusaglia.



Omi, donne, giovani, anziani, eranu parechji oghje ad esse venuti per rende un ultimu omaggiu à quell'omu di prima trinca, u Prete Mondoloni.
Omu di Diu, omu di valore, era dinò cunnisciutu per u so stintu di patriottu corsu.  À u sonu di a Ciccona, di capu versu a navata, di pettu à populu di Diu, cum'ella si face per un omu di ghjesgia, a cascia era sposta in tarra, cum'ellu à vulia. C'era sopra u so abbitu, vistitu biancu di u battizatu è a so stola, simbulu di a carica pasturale. 

 

U Prete Mondoloni hè statu accumpagnatu da centinaie di corsi, amichi, cunniscenza, merri, un elettu di a Cdc, cunfratelli è una trentina du preti è diacuni.  

 

Omu passiunatu è indè l'impettu di a so giuventù, pudia integrà a prestigiosa scola di Saint-Cyr, mà prifirò e gioie di a machja è di l'illegalità" cuntava u prete Olivier Culioli, di a Pieve di Corti. E si vidia, in quellu mumentu ind'a ghjesgia di San Francescu, calchì surisu di ricordu in bocca di quelli chì l'anu cunnisciutu. 

 

Dop'à sventure, degni di rumanzi è unipochi di passi per a casa "priggiò", scuntrarà u Signore mentre un sughjornu in Spagna. Ci principiarà e tappe di a missione, mà troppu libaru, sarà ghjudicatu troppu impistatu, cù un carattare troppu forte per esse indè u rangu. Intelligente, interrugante è interrughendusi senza piantassi, studiarà mentre 10 anni. [...].Più tardi, Jean-Claude ghiunghje à u so scopu. Esse prete. Natu à u Liban, divente prete di u diocesi d'Aiacciu. Tarra di i so antenati. In principiu di l'anni 80, ghjunghje in Ponte à a Leccia. Jean-Claude hà 2 bandere. A prima, à più bella ch'ellu avia! A so suttana. A siconda era a Bandera. Divinterà un simbulu si u naziunalisimu corsu. Omu libaru, isse duie bandere y mettenu cusì in risaltu". 

 

Cun grande emuzione è rispettu, sò i preti ch'anu accumpagnatu fin'à a porta u s'amicu, per rimettelu à cristiani fora,  purtalu fin'à u campu santu.  

 

Uffizià quella messa era un onore fattu da un amicu è un cunfratellu. Cum'è l'aghju evucatu mentre a mo umelia, ùn era micca puliticamente curettu. Era un omu di qualità è di ghjustizia. Andava sempre verdi u più abbacciacatu, quellu attaccatu. Ùn li piacia micca ch'omu tiri annant'à l'imbulenza. Pudia piglià a difese d'un omu, ancu puru senza lea d'affettu particulare c'un ellu. Era un omu cù una bella parsunalità, è cù una sinizzica sanguigna " hà pricisatu u prete Olivier Culioli, aghjuntu da Patricia, un amica di U prete Mondoloni. " m'arricordu un omu fugosu, mà l'aghju vistu aghjinuchjassi in ghjesgia, davant'à i so paruchjani pè chere perdonu, s'ellu avia francatu e limite. Davant'à ellu, ùn si pudia stà indiferente". 

 

À mezu à a famiglia naziunalista, s'annutava on particulare a prisenza di Jean-Christophe Angelini, solu elettu prisentu di a CDC. " Sò cullatu per rispettu è per marcà un'affezzione particulare à un omu ch'hè statu un esempiu per parechji, particularmente per e generazione attuale. Avemu cumminciatu à milità quand'ellu era digià una figura impurtante di u muvimentu naziunale. Era un omu di cunvinzione, d'ingagiamentu è di cunflittu mà attempu era un omu di pace, di ricuncigliu è ancu di perdonu. Mi paria naturale d'esse prisente oghje in tantu chì militante è in tantu ch'elettu. Sò ciò chè nò duvemu tutti à omi cum'è u prete Mondoloni". 

 

Oghje si n'hè andatu à ritruvà u so signore" 

Addiu o Sgiò Curatu.





Dans la même rubrique :
< >

A la une | L'actu régionale | Faits divers | Société | Justice | Economie