Croneca corsa : Penalty o micca penalty ?

Ci sò ghjorni, ind’u ghjocu à ballò, fighjulendu a Télevisiò, induve vulemu scambià di prugramma. E passà da un macciu chì ci adurmenta à un filmu o un’emissione di varietà (ancu à The Voice). Eppo, ci sò mumenti induve issa magia ch’è no t’aviamu zitelli, quand’i nostri ochji eranu maravagliati da  i ghjesti di quelli ghjucadori tremendi, chì ci pigliani e tripe è u fiatu sin’à a fine. Quellu Réal-Juventus di a settimana scorsa hè, senza alcunu dubbitu, di quessi. Quale hè chì mettia una pezza nantu à a vittoria di i Taliani nanzu à u macciu ?


Poca ghjente à dilla franca. Eppuru, sò passati vicinu, vicinu di qualcosa di strasordinariu. Pinsate ! Quelli CR7, Bale, Isco, Marcelo, Kroos, pinsavanu ancu elli ch’è l’affare era in u saccu. Ancu i tifosi di a vechja signora elli stessi. Ma, cum’è u ghjornu nanzu in Roma, s’hè passata qualcosa. E ancu di più. Perde 3-0 in casa soia in quartu di finale di a Lega di i Campioni, masimu di fronte à u Real è tutti i so « galactichi », è vince 3-0 à 10 seconde di a fine, si pò cercà, serà difficivule à truvà. Tandu, a sapemu ch’è a Juventus ùn hè tanta amata in Italia stessa. Eppuru, pudemu pensà, ch’è tutti i Transalpini ch’eranu davanti à u so postu di Televisiò, ùn la credianu mancu. Tamantu maccione !!! Ci avvicinavamu à 30 minute in più. E quì, nimu ùn la sapia quale ch’avia da vince. Si ghjucava forse, in capu, issu macciu. In Santiago Bernabeu, era li stessu. Mancu un fiatu…Tuttu u mondu s’appruntava à campà un mumentu magicu…Eppo, hè ghjuntu iss’ultimu ballò, una capata di CR7 per Lucas Vasquez chì casca, toccu o micca da Benatia. Penalty o micca penalty ? Iè sicura per certi, innò per i Talianu è tutti i sustenitori di a Juventus. Ma per tutti quelli passiunati d’issu ghjocu, a realità, di sicuru, d’avè mancatu 30 minute in più d’un macciu chì hà da stà ind’è e nostre memorie…
Peccatu!