Corsica : Ver di un mondu novu ?

A pensaiate voi ch’è i naziunalisti avianu di vince cusì l’elezzione territuriale u 10 di dicembre scorsu? Un veru tarramottu è tamanta piulata per i partiti tradiziunali ! Dpou à i scrutini di u 2015 è ancu e legislative di ghjugnu, si sapia ch’è a Corsica era in traccia di cambia u so sguardu nantu à a pulitica. Ma i resultati registrati, nimu ùn ci credia. Eppuru lanu fattu. Un resultatu chì marca, di sicuru, l’apertura di un mondu novu è a fine d’un altru. Forse un’alba nova, principiata di dicembre u 2015. E s’è noi fighjulemu bè, si vede ch’è a Corsica hè stata sempre in « prima ligna » per marcà un cambiamentu. Ùn la credete micca ? Induve hè nata a prima custituzione demucratica in Auropa masimu à un’epica induve i Rè eranu i maestri di u mondu ?



Certi puderanu cuntà ch’è Pasquale ùn era u « babbu » tantu unuratu da tutti i Corsi. Pocu impreme. U  fattu hè ch’è a Corsica fù a prima Republica in Auropa arrimbata nantu à u mudellu inglese. Dui centu anni dopu, quale fù u primu departimentu à esse liberta da l’Allemani ? A Corsica, di sicuru. E senza aspettà succorsi da l’altri. In fine, si pò dì ch’è dicembre u 2015 marcò un cambiamentu puliticu è micca solu ind’è noi. Dui anni nanzu è scunfite maiò di a diritta  di a manca « tradiziunali » in Francia. Un sintimu cunfermatu di ghjugnu scorsu cù l’elezzione de Macron à u capu di u paese è d’altri (appena nanzu) cum’è Trump in America. Iè, si pò dì, oghje, è a dicenu d’altronde i « capimachji » pulitichi, ch’è un’idea di a pulitica hè compia. Lascia, à pocu à pocu, a so piazza, à un mondu novu…
Chì s’hà da passà avale ? Nimu a sà ma sapemu ch’è a Corsica averà di sicuru qualcosa da dì, da mustrà. Face parte di a so storia…