"Stonda Corsa" incù i ziteddi cursofoni

Una nova sperienza hà da essa in prova, issa duminicata. U Cullittivu Parlemu Corsu, chì faci sempri prova d'imaghjinazioni in i so azzioni in favor' di a lingua, urganiseghja sta volta una "Stonda corsa", mà unicamenti cù ziteddi. In a cantina di a scola di A Riventosa (rughjoni di Corti) sarani adduniti ziteddi cursofoni, di tutti l'età è di tutti i scoli di l'ingiru. 

U prugramma di a ghjurnata, chì si tenerà sulamenti u Sabbatu u 24 di Nuvembri, hè assai insummatu è propriu diversu. Filmati in lingua corsa, ghjochi di morra, picculi dibattiti, tuttu què pà incuragiscia i ziteddi à andà versu à a lingua, è soprattuttu, versu à l'altri incù a lingua. Si tratta quì, spieca u prugramma, di rivisità è d'andà ancu di più luntanu ind'è u cuncettu d'immirsioni. Sempri in dibattittu, ma di più in più adupratu in i scoli primari, l'immirsioni pari dà risultati boni assai, cum'è ne testimuneghjani i rapporti ricenti dati à u Ritturattu (i ziteddi bislunguii è in immirsioni sculari uttenani risultati meglii cà l'altri).

A chjama hè dinù lampata à u bon vulè di i parenti di i ziteddi, chì puderani din ritruvà si quallà, è dinù sparta trà d'iddi i mutivazioni chì li portani à metta i so ziteddi in i scoli bislinguii. Parechji prufissori di u rughjoni Curtinesi sarani prisenti, notamenti di a scola primaria bislingua di Sandreschi, in a Cità Paulina. Iss'ultimi sarani incarcati da l'animazioni, è guidarani i ziteddi duranti a ghjurnata. 

Aiutata di l'animatori benevulenti di u Cullittivu, i prufissori cunterani foli in lingua nustrali, farani cantà i ziteddi, è sopratuttu, li parmettarani di sorta appena di u circondu sculari. U scopu principali essendu di muscià à i ziteddi chì ùn sò micca soli à parlà u corsu, è chì, in Corsica sana, altri quant'è iddi ne facini tantu. 
Liviu CASTEL
-------
Tutti l'infurmazioni quì : http://parlemucorsu.blogspot.fr/