Marceddu Jureczek unuratu à u ritturatu di Corsica

Quandu ellu hà piddatu a parolla issu marcuri matina, subbitu dopu à Julie Benetti, Rettrici di Corsica è Ghjuvan Maria Arrighi, Ispittori pedagogica incaricatu di a lingua corsa, Marceddu Jureczek ùn avia appruntatu nudda. U prima prufessori agrigatu in lingua corsa hà parlatu subbitu di « qualcosa di cullitivu sulcatu dipoi u 1914 cù a Cispra è cuntinuatu sempri dopu. Ci hè una dimensioni simbolica. E ùn hè c’un primu passu. Speremi avale, d’altri prufessori agrigati. E speremi, nanzi à tutti, a salvezza d’issa lingua. »
Una parti, di sicuru, di u caratteru d’issu omu di talenti, prufessori, insignanti, musicanti (unu di i primi membri di u gruppu Dopu Cena in u 2000), scrivanu (quattru libri scritti) è un impegnu maiò dipoi trent’anni. Un omu natu in u quartieru di u Borgu in Aiacciu (1973) ma di ceppu taravesu cum’è d’altrondi unu di i so maestri Rinatu Coti. Era logicu di vedi accantu à eddu, u famosu autori corsu. In questa ceremonia, Julie Benetti, Rettrici nova, hà parlatu,edda di a « ricunniscenza d’un travaddu. Nimu ùn pò essa satisfatu oghji, di veda una lingua è una cultura sparisci. U vosciu sucessu sarà forse simbolicu cum’è l’aveti dettu. Ma s’edda hè cusì, ghjè par un vosciu impegnu parsunali, e vosce radiche, u vosciu militantisimu in tantu chì prufessori o scrivanu. U vosciu percorsu và aldillà di tuttu. Ci tocca, oghji, à sviluppà a lingua corsa nantu à un tarrenu di ricchezza, di riflessioni. Un passu da francà ver di u plurilinguisimu… »
A Rettrici ùn hà mancatu nanzi di dà a parolla à u prufessori agrigatu, d’unurà a Celine, a so moglia è Pierre-Toussaint è Ange-François, i so fiddoli.
Iss’agregazioni, Ghjuvan Maria Arrighi l’hà dedicata à tutti quelli chì si sò battuti dipoi tanti anni per fà la nasci. Ma dinù à u Statu per u so impegnu.
In fine, hè c’una cert’ emuzioni ch’è Marceddu Jureczek hà piddatu a parodda par compia. « Oghji, pensu à tutti quiddi, cunnisciuti o micca,  ch’ani travaddatu par a difesa di a noscia lingua. E ch’ani fattu tantu…Pensu sopratuttu à  u me amicu Paulu Zarzelli chì divaria essa quì à a me piazza… »
Un beddu umaggiu…