Corse Net Infos - Pure player corse

Di maghju o di maghjone, à e pecure iè si caccianu i piloni


Rédigé par Maria-Serena Volpei-Aliotti le Dimanche 19 Mai 2019 à 09:29

À chì dice mese di maghju in Corsica, dice dinò tundera in u mondu di i picuraghju. Chì cun quellu mese di veranu, hè principiata a stagione di a tundera. È ancu puru se si face oghje cù tundose elettriche, stu mumentu ferma sopratuttu stonde di feste, d'aiutu è di spartera per i pastori di l'isula.
Sta dumenica u 19 di maghju, ind'è Sabrina è Sébastien Mercuri, in l'Ostriconi, ghjè un ghjornu induve pastori di u circondu, famiglie è amichi si ritrovenu.




"Ne pè maghju, ne pè maghjone ùn ti caccià u to Pilone",si dice, è quist'annu l'averemu capita. Ma stu pruverbiu ùn hè micca valevule per tutti, chì ghjè à s'etpica quì chì percure è annutini sò tosi.
In l'Ostriconi, a banda di Sébastien è Sabrina, cumposta di più d'ottu centu pecure, s'appronte. 



Sta mane à bon'ora, tutt'hè quasi prontu per principià u travagliu. Inchjustrate, quelle aspettanu a so tundera, mentre a priparazione di u materiale. 

È cum'è ogni annu, dipò u cambiamentu versu a tundera muderna, ghjè una squadra di prufessiunali ghjunta da u cuntinente, chì s'accupe di ste damicelle lanate. È in Corsica, à ognunu u so settore. " Ci sò sei o sette squadre chì venenu da u cuntinente per u mese di maghju, è chì giranu a Corsica, chì e tundere si facenu in quell'epica. Certe volte si pò ancu francà u principiu di u mese di ghjunghju"spieche Gregory. 



In Balagna ghjè a squadra di Léo, Jale, Charly è Grégory chì opereghje, rinfurzati quist'annu da dui amichi neuzelandesi. "Simu sei per tonde chì e pecure sò numarose oghje ".

In calchi minuta è u tempu d'un picculu caffè, u travagliu pò principià. 

Cù un andadura da trenta à sessanta pecure tose à l'ora, e centinaie di bestie sò spugliate prestu fatta, in una maitinata. 

À chì intuppa, à chì tene è à chì tonde, ancu i più chjuchi danu un colpu di manu. Ghjuvan'Sebbiu, 6 anni, tene a banda cù u so babbò. 

Di famiglie di pastori, Sabrina è Sébastien, anu sempre cunnisciutu quelli mumenti. "Simu nati nentru. Avemu fattu u contu di mente è simu ricullati fin'à u 1792, in Ascu". Mercuri è Martini falavanu tandu per i primi in l'Agriate è per i sicondi in u Reginu.  

 


Dop'à una maitinata di travagliu intensu, vene c'un piacè u mumentu di sparghje un pezzu di pane. " Femu a tundera in dumenica di manera à chì tutt'a ghjente di u paese possa vene, chì ghjè un ghjornu di festa"conta Sébastien. O più tostu, un bellu ripastu abbundante è famosu. Una longa priparazione fatta a veghja, cù ricette di famiglie. À u menù oghje, salameria, pecura in salza cù macaroni è pastizzu. " Fattu sta notte cù latte muntu eri sera" aghjunghje Sabrina, aiutata da Anna Maria, 9 anni. 

 

 

 






Dans la même rubrique :
< >

Vendredi 23 Août 2019 - 09:14 Un yatch de 15 mètres en difficulté à Lisula

Livres | Musique | Evènements | Lingua corsa | Cuisine















Newsletter




Galerie
Cadets de la Sécurité civile
Cadets de la Sécurité civile
I Piulelli
I Piulelli
Girandella di a lingua in Cervioni
Girandella di a lingua in Cervioni
Cambridge-air-Corsica
Cambridge-air-Corsica
Tournoi Fortune Lebras
Tournoi Fortune Lebras
Sainte Restitude
FC Balagne
U Soffiu di Balagna
Festa di U Veranu
Jeux des Iles
Sainte Restitude