Corsica, Trà mare è monti : I ritratti di Loïc Colonna

Quand’omu ammenta a storia di stu populu, si cerca à spessu a piazza cuncessa à « u mare ». Stu mare chì fù è chì ferma sempre, à i ghjorni d’oghje, a strada a più sicura, siasi per l’invasore, siasi per a partenza o puru u sognu.

Voli sì, voli nò, a mo memoria visuale u cerca ognitantu, nè per brama di parte, nè mancu per paura : hè cusì è basta. U mo mondu hè verde è hè turchinu di culori, quant’ellu hè silenzii è parolle, sguardi è gesti.

Allora mi dicerete ch’ellu s’ampara à spessu chì « longu à i seculi, u spaziu internu s’hè custruitu ingiru à u funziunamentu di a nostra sucetà agrupasturale, cù a muntagna appaghjata à a so piaghja ». Guasi guasi, u mare ingiru u vede u corsu cum’è una scumessa… Ma à mè, ùn mi basta què da fà un riassuntu fidu è cumpitu di ciò ch’elli sò i corsi ….

Ùn simu più oramai in tempu di fole o di canzone; vogliu vene à dì, cù semplicità, ch’ùn sò ancu capace, à i mo anni, à definisce ciò ch'ellu hè u « spaziu corsu »… Iè, Mare o monti, induve serianu e fruntiere per noi altri corsi ? Serà u tagliu di u mare ? A rena o i scoglii? Seranu l’alte cime di a sarra, sopr’à u paese nativu? Seranu e schille perse per ste vorghe o e parolle perse di u mo babbone?

Corsica: à chì v’hà da risponde ch’ella ferma stu battellu persu à mezu Terraniu ; quill’altru v’hà da cappià ch’ella hè un spaziu chjosu, scumpartutu, valle à valle, pieve à pieve. Ùn sò di quelli chì ponu sceglie, cù sta certezza pretenziunuta, induv’ella pianta a strada. Spaziu chjosu è cunfinatu ? Spaziu apertu in brama di partenza ? Quand’omu piglia per chjassu, beatu à quellu chì sà induv’ellu l’hà da purtà…
Per contu meiu, u più serà sempre di parte à l’inforse, nant’à qualunque via, per sente, per vede o per scuntrà, per dubbità dinò. Chì quandu a vita vi piglia à l’assuffrettura, vi ne ricurdate, o in bè, o in male.. È ne cacciate qualcosa.. Cusì ch’ella hè nata, mi pare, sta sfiuricciata di ritratti è stu libru.

U pigliu cum’è un rigalu chì scuprendu tutti sti ritratti, provu à imaginà sta cerca cuntinuva, longa, à le volte addisperata di l’artistu ; pensu senza nisun’ pretenzione chì e so stonde di dubbitu, e possu propiu misurà. È, s’è n’andemu bè, sò ancu capace à infattallu in quellu mumentu chì u cummove, per chjassu, l'attimu ch’ellu hà stantaratu, iè, sta scelta, finale, d’un ritrattu à piglià, chì, ancu s’ellu pare più chè bellu, ùn serà, à l’ochji soii, mai perfettu.. Hè cusì, è serà sempre cusì …

Corsica di mare o Corsica di monti ? Innò ! Solu l'attu di vita d'un omu, cù una sensibulità chì dà pettu à tant’ore di viaghju, per mare o per terra, per mesi è per stagione. Chì a Corsica, o zitè, ferma un viaghju ancu à compie, Iè, un viaghju,è forse u più bellu per l’impegnu di stu corsu.

U so mondu hè verde è hè turchinu di culori, quant’ellu hè silenzii è parolle, sguardi è gesti.. Oghje ti dice solu perfine: “ voli impedisce à l’ochji di vede? “…
 
Le livre "CORSICA, Trà mare è monti", en vente sur www.photocolonna.com , au tarif de 30€.