Corse Net Infos - Pure player corse

Corsica Libera chjama à maiurità territuriale à un rinforzu


Philippe Peraut le Mercredi 13 Février 2019 à 21:16

U muvimentu indipendentistu hà datu una cunferenza di stampa issu mercuri à u Caffè Napuliò d’Aiacciu per chjarisce a so pusizione in giru à trè temi specifichi : a tarra, l’impiegu è a lingua. Una manera, dinò, di chjamà a maiurità territuriale à rinfurzà a so pusizione intornu à iss’imbusche fundamentale è, à tempu, di risponde à ciò ch’aspetta a ghjente…



Ci era u mondu sta mane à u caffè Napuliò in Aiacciu induve Corsica Libera dava una cunferenza di stampa. À a tribuna, eletti (Michel Giraschi, Laura Maria Poli, Laura Furioli, Petru Antò Tomasi, Pierre José Filipputi, Paul Leonetti, Vannina Buresi, Marie Simeoni), Petru Paoli, Carlu Pieri…In a sala militanti cù, frà elli, Jean-Guy Talamoni, presidente di l’Assemblea di Corsica. Une cinquantena di persone in tuttu. Ghjè Laura Maria Poli chì parla à nome di u muvimentu, fendu, prima u riassuntu di quaranta anni di lotta. « A lotta armata, suciale à stituziunale hè sbuccata nantu à u naziunalisimu mudernu. Una riesciuta, dinò, quella di i trè partiti adduniti nantu à i fundamenti chì sò a tarra, u populu cù i so mezi di vita è a lingua. »
Di fatti, isse trè tematiche sò state sviluppate da l’eletta… « Scelte maiò di a fundazione di « Pè a Corsica »…A tarrra cù « un veru prughjettu d’interessu publicu è a lotta contru à a speculazione, l’impiegu è « u drittu fundamentale di u populu di campà nantu à a so tarra cù un’ecunumia ghjusta…è, in fine a lingua è « u rispettu di ciò chì hè statu valutatu da u Statu (Pianu 2020, cunvenzione…).
Corsica Libera dumanda, tandu, un rinforzu di « Pè a Corsica » per apre, dopu à quattru anni di putere, un’ altra sequenza… »Per ùn allutanà u populu di e so scelte fundamentale… »
« Issa cunferenza, spiega Petru Antò Tomasi, vene à a seguita di quella di a rientrata di settembre scorsu. Ci tocca, oghje, à finisce cù a messa in piazza di a Culletività unica è passà da a gestione di l’affare di tutti i ghjorni à un tempu più puliticu… »
Ste pruposte seranu sottumesse, d’altronde, à a prussima sessione di l’Assemblea…