Calvi : A parola data à i giovani imprisaghji balanini

Mentre issa riunione, ognunu hà pussutu spiecà a so storia, scambià idee per pudè travaglià è sviluppà si inseme mà dinò, palisà i diversi prublemi chì si ponu scuntrà per mantene un'attività.
" Dipò anni è anni, si sente parlà di a giuventù à l'addisperu, quella ch'ùn riesce micca. Mà ùn si parle mai di quella chì travaglie, chì innove, intraprende è sopratuttu quella chì si dà i mezi di cresce è campà quì. Vulemu fà li sapè chì noi, eletti di a magiurità, simu à fianc'à elli per accumpagnà li è aiutà li in e so vite prufessiunale," ci hà spiecatu Pasquale.  

A prima persona à piglià a parola era Camille Martelli, capu d'impresa è eletta à l'assemblea di a giuventù. Hà prisintatu ciò ch'era quella assemblea, spiecatu i sfarenti travagli fatti da i giovani è parlatu di l'impegnu di quelli indè a vita pulitica" Fin'à 25 anni, vi pudete apprisintà. Fate la puru". 


In più di fà li scuntrassi prufessiunalmente, sta stonda ci hà permessu di parlà di i prublemi ricurrenti ch'elli ponu truvà. I prezzi si i biglietti per i studienti corsi chì facenu parechji pass’è veni trà Corsica è cuntinentu, "ùn avemu aiuti. Sò in corsu in Nizza, facciu u mo stagiu in Calvi, dunque francu spessu u mare... Senza aiutu finanziariu " hà cunfidatu una giovana studiente. E dificultà dinò di truvà un lucale cù prezzi accessibili. " Oghje, mi trovu fora. Anu vindutu u lucale ch'avia eiu appiggiò," hà spiecatu Tania Andreo di Corsica Beauty, nanzu di cuntinuà. " Oghje cercu à stallà mi, mà aghju troppu difficultà. Dunque sè devu parte per mantene a mo sucetà arritta, mi n’anderaghju ". 
" Era per mè impurtante di dà li a parola. Di cunnosce e so difficultà. A nostra giuventù si move, imu à l'ascoltu" hà aghjuntu Pasquà
Cù ricadute pusitive, si pò pinsà chì quella prima riunione ùn sarà forse micca l'ultima.