Corse Net Infos - Pure player corse

Aiacciu : ​I naziunalisti aprenu a campagna municipale


Vincent Marcelli le Mercredi 26 Juin 2019 à 20:38

Ind’una reunione publica, urganizata stu mercuri in a sala « Prestige » di u Palazzu di i Cungressi d’Aiacciu, u PNC è Corsica Libera anu chjamatu tutti i naziunalisti à una adunita generale in u quadru di e prussime elezzione territuriale. L’imbusca maiò serà, i mesi da vene, di sapè s’è i dui partiti sò capaci d’adunisce i Corsi aldilà di i so muvimenti. Una chjama ver di una mossa più larga, masimu à tutti quelli ch’ùn avianu micca vutatu in u 2014 hè stata fatta. Una cosa hè sicura, a campagna principia !




(Photo Michel Luccioni)
(Photo Michel Luccioni)
Senza fà un parangone cù a campagna di dicembre u 2017, si pò dì ch’ella ci era, issu mercuri in a sala « Prestige » di u Palazzu di i Cungressi d’Aiacciu, comu una spezia d’ambianza cumuna. À a tribuna, Jean-Guy Talamoni, presidente di l’Assemblea di Corsica, ghjuntu cù a « baretta » di Corsica Libera,  Paul Leonetti, Julia Tiberi, Vannina Buresi, eletti territuriali è Pierre Paoli, di u muvimentu indipendentistu. Accantu à elli, Jean-Christophe Angelini, capifila di u PNC accumpagnatu da Jean-François Casalta, elettu,  Léon Giacomoni, insignante è Cathy Bartoli, respunsevule di l’associu « Sulidarità ». In a sala, Paul Marcaggi, presidente di a CCI2A,  eletti, militanti è simpatisanti di i dui partiti ma dinò aldilà di i dui partiti.

Jean-Guy Talamoni, piglia u primu a parolla tarruchendu : « Sò aiaccinu d’aduzzione, mi piacenu e figure d’issa cità ma ùn seraghju micca candidatu à e municipale. Più seriu, si tratta d’una guerrilla ammistrativa è ghjuridica cù u Guvernu. I Corsi devenu dì in Parrighji ch’ellu ci hè un populu chì marchja ver di u so destinu. Comu fà per ottene ciò chì ci rivene di dirittu ? Chì ci vole à fà, ùn ci hè più viulenza, ùn semu più minuritarii à l’Assemblea, Parrighji ùn hà più scusa ! Ci tocca à vince in Corsica, l’ultima battaglia : a battaglia pulitica.»

Uniti per una strategia nova
Per fà l’acconciu, u presidente di l’Assemblea hà mintuatu l’ingredienti ch’anu permessu à i naziulasti di vene à u putere in u 2017 : l’unione.
Eccu l’imbusca maiò à l’occasione di e prussime municipale. S’hè trattatu « d’Aiaccini d’aduzzione, di core, di destinu » ma dinò di e scelte pulitiche di a municipalità è di prublemi maiò (ingorgu, sviluppu ecunomicu, parcheghji, quartieri pupulari di a cità). Unu à unu, l’intervenenti anu palisatu isse scelte è prupostu « una strategia nova per a cità a più impurtante di Corsica ».
« Da 217 voti in Aiacciu in u 1983, semu, oghje, in capacità di piglià a merria, spiega Pierre Poggioli, ma ci hè una dimensione naziunale. Per vince, ci vole à fà l’unione, hè una respunsabilità maiò. A situazione hè scambiata dapoi u 2014. Avemu u tempu è ci vole à mette in piazza un prugrama precisu… »
À deci mesi di u primu giru di e municipale, a prima unione, trà u PNC è Corsica Libera ùn saria ch’ùn primu passu. « Una scumessa vinta, aghjusta Jean-Christophe Angelini, per andà aldilà ver d’altre unione è sbuccà nantu à a cunquista di a merria d’Aiacciu…Ùn hè micca una reunione opposta à Femu ma solu per fà l’unione. Apertura à d’altri per una lista arrimbata nantu à una altra dinamica. »
Paul Leonetti, dighjà cunsiglieru municipale hà palisatu, ellu, « u clientelisimu di a municipalità. Hè ora di passà à altra affare. Avemu da truvà un candidatu naziunalistu ind’una mossa cumuna per vince s’elezzione. »
In fine, ghjè Jean-François Casalta, chì pudaria esse capilista, chì hà pigliatu a parolla : « Dapoi u 2015, avemu vintu tante battaglie, tutte in demucrazie, cù a logica di u votu. Ci hè una cunfidenza è semu nantu à una dinamica. È ghjè a vittoria di tutti. Semu tutti militanti, aiaccini è naziunalisti ma e cundizione ùn eranu micca tutte adunite per una mossa generale. Eppuru, a demarchja hè quessa quì. Dapoi un annu, semu prisenti in i quartieri, palisemu ciò ch’ùn và micca in u sensu di u sviluppu d’Aiacciu….Semu in situazione di reasgisce. »
Una manera di chjamà tutta famiglia naziunalista ma sopr’à tuttu aldilà. Forse tutti quelli ch’ùn avianu micca vutatu di u marzu u 2014. Dopu à e territuriale, legistative, u scopu hè annunciatu : chjamà  i naziunalisti è un’apertura più larga per vince di marzu u 2020. Un’altra scumessa forse ancu più maiò di fronte à a citadella aiaccina…
 





Dans la même rubrique :
< >

Dimanche 8 Décembre 2019 - 19:45 Aiacciu festighjeghja l'ottu di dicembre

Livres | Musique | Lingua corsa | Cuisine
















Newsletter



Galerie
Halloween Calinzana
Halloween Calinzana
1er palmarès d'architectes en Corse
1er palmarès d'architectes en Corse
Universita di Corsica-CNRS
Universita di Corsica-CNRS
Sfida Capicursina
Sfida Capicursina
Sélection coupe du Monde de la pâtisserie
Sélection coupe du Monde de la pâtisserie
 Salon du chocolat de Bastia
 Salon du chocolat de Bastia
ACA-Nancy
Rhodanus
Mohamed Hamidi présente Une Belle Equipe
Da Capandula à Santa Maria