Pitretu è Bicchisgià festighjeghja a lingua corsa

Passata da una settimana à un mese, a festa di a lingua corsa hà francatu un passu è si sviluppa di più in più da per tuttu in l’isula. Issu vennari, eranu belli numarosi à vene à u culleghju di Pitretu per participà à issa manifestazione. Trà dui centi è trè centi sculari ghjunti da parechji stabulimenti di i circondu (Pruprià,Sartè, Suddacarò, Livesi, Grussettu, Sarra di Farru…) è ancu aldillà (Cuzzà, Purti Vecchju…)
Una ghjurnata principiata in canzone da a scola materna di u paese cù « Ci hè Corsu lu focu » di Felì. Dopu, Rinatu Coti hà datu i trè fundamenti d’un populu : « a lingua, a storia è a cultura. » U tuttu nanzu à une trentina d’attelli diversi : ghjurnalisimu spurtivu, brocciu, manghjà, parcu Naturale di a Corsica, Canopé, Scacchi, ballu, genealugia, musica…
« Issa ghjurnata era fistiva, spiega Maria Paula Langianni, prufessore di corsu à u culleghju, avemi sceltu parechji tematichi trà u cantu, a cultura, u manghjà. Hè una manera di muscià chì u corsu pò entri in tutti i duminii di a sucetà. Tuttu u mondu a devi parlà è fà la spampilllulà… ».
Una festa chì cresce à pocu à pocu è chì si sparghje pian’pianinu. Una bona per e genereazione ch`anu da ghjunghje…