Corse Net Infos - Pure player corse

Festa di a lingua di u 2019 : un’altra dimensione


Rédigé par Vincent Marcelli le Vendredi 26 Avril 2019 à 18:22

Gilles Simeoni, presidente di l’esecutivu di Corsica è Saveriu Luciani, cunsiglieru esecutivu incaricatu di a lingua, anu prisentatu issu vennari in fine di matinata in i scagni di a Regione, l’edizione 2019 di a « Festa di a lingua » è, à tempu, un dispusitivu novu « e case di a lingua ». U scopu d’issa manifestazione chì si sviluppa di più in più hè di prumove l’usu di u corsu in u duminiu di l’educazione ma dinò à u nivellu sucetale. Un primu passu, forse, d’una strategia chì sbuccaria, à longu andà, nantu à una sucetà bislingua…




Festa di a lingua di u 2019 : un’altra dimensione
Gilles Simeoni, presidente di l’esecutivu di Corsica è Saveriu Luciani, cunsiglieru incaricatu di a lingua, accumpagnati da Bernardu Ferrari, direttore di u serviziu di a lingua, eranu in i scagni di a cullettività issu vennari matina per prisintà, u lindumane di a sessione, l’edizione di u 2019 di « A festa di a lingua ». Una manifestazione nata in u 2012 per, ghjust à puntu, prumove  l’usu di u corsu. Dapoi issa data quì, associ, cumune è imprese s’impegnanu à prò di a lingua. « Avemu quantunque francatu un passu, spiega Saveriu Luciani, postu ch’è noi semu passatu d’una manifestazione chì era, à l’iniziu, un’azzione simbulica « a simana di a lingua » è ne semu, avà à guasgiu trè mesi cù azzione sviluppate sin’à à fine di l’annu. »

260 000 euri ingaghjati
Per l’occasione, associ è imprese anu rispostu à una chjama à prughjetti lampata di ferraghju scorsu è chì anu da esse aiutati per a realizazione di u so prugramma. Cusì, è per esse à prò di a lingua, di u sou su è per marcà isse festività, a Culletività hà ingaghjatu 260000 euri. « Ci hè una dinamica chì si sviluppa, ripiglia l’elettu, a sapemu chè ci vulerà à aspettà monda per sbuccà nantu à i resultati ch’è noi vulemu, vale à dì una sucetà bislingua ma, strada facendu, à pocu à pocu, avanzemu. »
Un impegnu, dunque, chì hà da insuchjà una dinamica. Cù l’imbusca maiò, dinò, di sviluppà, di sicuru, l’aspettu educativu (immesione in e scole) ma, à tempu, a diffusione sucetale.
« A piazza di a lingua corsa in a sucetà ci pare impurtante, aghjusta u president Simeoni, u scopu maiò hè di prumove l’usu di u corsu in tutti i duminii pussibili per una lingua viva è ufficiale. »

« E case di a lingua » : un arnese novu
Hè per quessu chè i dui eletti anu arrimbatu à a so cunferenza di stampa intornu à lingua, u dispusitivu « e case di a lingua ». S’agisce d’un arnese maiò in direzzione d’ogni attore (associ, individui, urganisimi, ecc…). « U scopu hè a messa in cumunu di i so mezi per assicurà un prugramma d’evenimenti o d’attività di qualità in tutale immersione in lingua corsa, è què durante l’annu sanu. »
Per avà, vinti strutture anu rispostu à a chjama à prughjeti ma s’è, solu deci seranu scelte secondu à u quaternu di e cariche, l’altre seranu accumpagnate ver di un altru sviluppu. Varietà di l’offerta, permanenza di l’azzione, cumpetenze, aghja geugrafica, messa in vale è valutazione di i staziante sò i criteri scelti. U bugettu serà di 200 000 euri a prima annata. 
U scopu serà dinò, à più o menu longu andà di sviluppà issa demarchja cù i Corsi d’altrò.
A lingua corsa addunisce tutti l’eletti. Per prova, a resoluzione vutata issu ghjovi sera à l’unanimità cù l aspettu maiò di a riforma di u liceu è di u basciliè. À longu andà, u scopu hè di mette u corsu in i dui aspetti: u sistema educativu (immersione), è a so diffusione in a sucetà. Per sbuccà, cum’ellu  ci hà dettu Saveriu Luciani à a fine di a cunferenza di stampa, nantu à a frasa : « A lingua di tutti, una lingua per tutti »
 



A la une | L'actu régionale | Faits divers | Société | Justice | Economie















Newsletter




Galerie
Cadets de la Sécurité civile
Cadets de la Sécurité civile
I Piulelli
I Piulelli
Girandella di a lingua in Cervioni
Girandella di a lingua in Cervioni
Cambridge-air-Corsica
Cambridge-air-Corsica
Tournoi Fortune Lebras
Tournoi Fortune Lebras
Sainte Restitude
FC Balagne
U Soffiu di Balagna
Festa di U Veranu
Jeux des Iles
Sainte Restitude