A Casa di a Natura, un situ d'amparera per i chjuchi è i più maiò

Piatta in u core di a furesta di Vizzavona, à u pede di u Monte d'Oru, a Casa di a Natura, hè un locu chetu, colmu d'amparera è di sapè.

Da 7 à 77 anni, a Casa di a Natura apre e so porte à gruppi sculari o associ diversi, da ogni origine. 

" Ricivemu i gruppi fin'à 34 persone. Certi ghjunghjenu ancu d'Italia, o di Sardegna. Ma per riservà un seghjornu, ci vole da fà a dumanda direttamente à a Casa di a Natura è parechje simane o ancu mesi di nanzu"spieche Chantal. 

Cusì mentre sei ghjorni, un prugramma riccu hè prupostu à i participanti, à mezu à un bellu patrimoniu naturale è culturale. 

"Si scopre a furesta di Vizzavona, a biodiversità. L'arburi, e piante, l'animali, a storia di a fureste è dinò a piazza di l'omu in quellu locu. Attraversu u paese di Vizzavona è a vita quì, à l'epica di u neuliticu, 6000 anni fà"priciseghje Jean. 

Sopr'à piazza si pò scuntrà animali è piante andemichi à a Corsica. Cù furtuna è pacienza, a variulata, è cù e mane in e stacche, a Nocca.

Fundata indè l'annate 70, a Casa di a Natura hè un stabilimente chì dipende di u serviziu di l'educazione di l'ambiente di u Parcu Naturale Righjunale di a Corsica. I gruppi sò accumpagnati in generale di unu o dui agenti animatori. " Sò spassighjate bislingue chì u Parcu hà firmatu à cartula di a lingua corsa poc'anni fà ". Esiste in Galeria un'antra struttura immersiva à a simana, a Casa Marina. " Quì si parla di a biodiversità di u mare è di l'ambiente in Giru è dinò di a machja". È dinò strutture cù specialità à a ghjurnata. " A casa Paoletti, in Castagniccia, a Casa di u Mele in Murzu, quella di a cuppulata in Multifau".