Corse Net Infos - Pure player corse

​Saveriu Luciani : « Ci hè, oghje, a necessità di mette, più chè mai, a lingua corsa à u centru d’un prughjettu suciale è puliticu di stu paese »


Rédigé par Vincent Marcelli le Jeudi 25 Octobre 2018 à 22:41 | Modifié le Samedi 27 Octobre 2018 - 00:14


À a sessione d’issu ghjovi, à l’Assemblea di Corsica, diciottu questione urale eranu priviste. Frà elle, una dumanda particulare, quella chì tocca à l’intervenenti in lingua corsa. Un parsunale pocu cunnisciutu adupratu à l’epica di u primu pianu linguisiticu in u 2002. Da guasgi quaranta à l’iniziu, sti parsunali ù sò più chè vintunu, oghje. Frà elli, parsone chì t’anu licenza o master. Tutti anu una sperienza di u terrenu è una certa pedagugia. Dapoi qualchì tempu, sò minacciati, masimu chè da u pianu di furmazione o da l’università, escenu o anu da esce, ghjente capace d’insignà. Chì fà di sta ghjente, tandu (certi sò dighjà pertuti è tutti custretti di travaglià à cantu) chè, à pocu à pocu, anu da sparisce ? Issa questione hè stata posta in fine di matinata da Paulu Santu Pariggi. Dopu à a so risposta à mezu à l’eletti di l’Assemblea, Saveriu Luciani, cunsiglieru esecutivu incaricatu di a lingua corsa, ci hà datu u so parè nantu à issa situazione.


S’hè trattata issu ghjovi à mezu à e questione urale, di u statutu di l’intervenenti in lingua corsa. Chì hè issu statutu ?
Isse parsone sò state messe in piazza  à partesi da u 2008 per via chè u Statu ùn la li facia à risponde à l’esisgenza d’offre un insignamentu di a lingua in ogni scola primaria. Infatti, l’articulu 7 di a lege di u 2002 impunia, ellu, sta carica. Iss’intervenenti sò, dunque stati ricrutati. Oghje, sò sia in cuntrattu CDD è sia in CDI. Sin'à d’avà, si passava à pocu pressu bè. Dipoi annu, un grande pianu di furmazione hè statu messu in piazza è, tandu, ci sarebbe à andà ver di a diminuzione d' issi posti. Quest’annu, è à l’ultimu mumentu, ottu intervenenti di u rughjone bastiacciu sò stati avertiti ch’ùn avianu micca u so serviziu cumplettu (diciottu ore). Ci hè stata una reazzione, una manifestazione. L’esecutivu di Corsica hà sustenutu a so demarchja. Avemu scontru a rettrice per dumandà una chjarificazione d’issa situazione. Ci hè, per noi, à tempu, a presa in contu di dumande suciale è un bisognu linguisticu maiò. Dumandemu dunque à u Statu ch’ellu pruponghi una strategia à longu andà nantu à a lingua.

Chì sò e vostre pruposte ?
Per noi, issa dumanda hè logica. Tocca à a rettrice à risponde avà. Pensemu, per contu nostru, chi ci hè, oghje, una situazione induve l’inseme di l’intervenenti ponu avè un serviziu cumplettu. À tempu, riflettimu à un statutu d’animatore linguisticu o territuriale. Quist’annu, ùn avemu micca, i mezi finanziarii di mette in piazza qualcosa d’abbastanza largu. Tandu, prupunimu sperimentu cù trè intervenenti, sopratuttu quelli chì t’anu difficultà suciale, dà li un postu d’animatore territuriale, da sviluppà, forse, in u quadru di u pianu 2020. Dumandemu, pè u restu, à a Rettrice, di piglià in contu issa dumanda d’accuppià, à tempu, una animazione sculare cù una animazione sucetale, in direzzione di e cullettività, e ciucciaghje, forse e parsone maiò o ancu e scole immersive. Ci saria a pussibilità, per noi, di truvà, à longu andà, una soluzione mettendu à parità un serviziu di l’insignamentu è l’azzione sucetale.

Chì saria a pusizione di u Retturatu ?
À sente li parlà, ùn anu micca sta visione à longu andà nantu à l’evoluzione di a lingua. D’un puntu di vista esecutivu, semu per a cuufficialità, una generalisazione di e scole bislingue è un sviluppu assai più forte di a sperienza immersiva. Dunque per noi, iss’intervenenti chì sò animatori pegagogichi anu un rolu più chè pienu à tene in issu dispusitivu quì. Ci sarebbe un prughjettu glubale da assestà, induve iss’intervenenti anu a so piazza. U prughjettu di u corsu nantu à l’insignamentu hè, per noi, una priurità. Ci serà, forse à un mumentu datu, a pussibilità d’aduprà isse persone ancu à u nivellu di u secundariu. Masimu chè ci hè una debulezza in certe trafile bislingue…

Ci sò vintunu intervenenti. Ùn puderanu passà tutti agenti territuriale. Chì fà tantu ?
L’avvene ci vole à permette lu è micca prumette lu. Una parte d’issa ghjente quì averà a pussibilità di passà u cuncorsu terza via (anu una licenza o ancu un master). Un altra parte pudaria passà agente linguisticu è territuriale cù un doppiu statutu. Ci hè, oghje, a necessità di mette, più chè mai, a lingua corsa à u centru d’un prughjettu suciale è puliticu di stu paese.

Chì saria a seguita di stu cartulare ?
Vulemu fà ricunnosce l’articulu ondeci di a cunvenzione firmata di nuvembre u 2016 cù u Statu. Era, tandu, privistu di mette in piazza un cunsigliu accademicu territuriale, di cu gestione di a lingua à u nivellu di l’Educazione. Ci hè stata una reunione cù a Rettrice per appruntà st’arnese. Ci serà, di nuvembre, un’altra reunione induve si tratterà di a gestione di l’intervenenti cù e pussibilità pedagogiche, suciale è prufessiunale da mette in piazza.




Dans la même rubrique :
< >

Dimanche 11 Novembre 2018 - 19:48 In Belgudè, s'arricordanu di quellu ghjornu

Livres | Musique | Evènements | Lingua corsa | Cuisine