Tutti in aiacciu per " Una Canzunetta"

Appruntata durante unepochi di ghjorni di nanzu cù a so maestra Lelia Rossi è Francine, i sculari scoprenu cusì vucabularii è sapè fà nustrali, ingiru à temi diversi.
Oghje, issi picculi Balanini passiunati, anu amparatu cù canzone cum'è "l'Aghje" di a Filetta, " E Muntagne d'Ese" di Canta u Populu Corsu, " Machja" di i surghjenti o "U mio cantu " di i Chjami Aghjalesi, a tribbiera, a natura è i sfarenti tippi di canzone corse. 

 

" Participà à l'emissione hà permessu à i zitelli di scopre canzone chì appartenenu à un rapertoriu ch'elli ùn cunnoscenu forse micca, cù canzone ch'anu seguitatu a mossa di u riacquistu è amparà a storia patrimuniale di a nostra cultura. À tempu, si travaglia dinò annant'à prugetti tutti inseme, ciò chì cree è rinforze i leami trà di elli, " ci spieca Lelia Rossi a maestra.  

 

Per i zitelli, cantà davant'à e camerà hè aventura strasurdinaria. " M'hà veramente piaciutu di cantà per l'emissione, mi piacerebbe à ricumincià spessu " hà cuntatu Cecilia 10 anni. Antò, ellu hè cuntentu d'avè pussutu amparà " E Muntagne d'Ese" indè a so intégralità. " A stoc'à sentu in casa meia mà cunniscia solu à prima strofa". Per Francè, cantà cù a so zia per a telé era un mumentu di felicità. " Noi avemu amparatu parechje parole attraversu issi canti ch'ùn cunnusciamu micca" anu cunfidatu Carla è Lola. 

 

" Una Canzunetta" hè una bella manera di tramandà a lingua. U nostru scopu hè di circà canzone chì ponu parlà di tuttu è chì arricchiscenu u travagliu di i zitelli. Avà sò sei anni chì a "Una Canzunetta" esiste è avemu travagliatu annant'à parechje canzone, ch'elle sianu zitelline o micca" hà spiecatu Francine Massiani. 

 

Isse stonde d'amparere musicale saranu diffuse da quì à un mese, un mese è mezu annant'à Via Stella è si ponu seguità annant'à Facebook è dinò annant'à YouTube.