Croneca : L'ora di a rientrata !

E per i nostri « amichi » turisti di Marseglia, Nizza, Lille, Bruges, Roma, Sassari, Atene o d’altrò, hè tempu dinù di francà u mare, lascendu , per quelli chì sò ghjunti ind’è noi per a prima volta, ricordi in a so mente. U « train-train », diciarianu i Francesi. Per noi, l’anni s’assumiglianu quantunque. Trà i turisti « lumachi » nantu à a strada, quelli chì anu trovu a vità troppu cara quì, ch’anu trovu i cumercianti corsi simpatichi cum’è porte di prigiò, i « ruspi » ch’anu pocu spentu, o quelli chì sò stati maravagliati, l’impressione hè guasgi li stessa. Da u nostru cantu, i paesi si viotanu « i fiumi carchi di « stranieri dinù »…, avemu da ripiglià u nostru ritimu. Ùn ci vole micca scurdà si di i cumercianti. Quelli chì anu trovu un « bichjeru mezu viotu », s’anu da lagnà. « Ùn ci hè più stagione, ùn ci hè più soldi, ci hè a crisa… ».


A crisa ?
Micca per tutti. Si trattaria, cù un millaiu di battelli ghjunti in Corsica, « yachts » è bell’affare, di 50 millioni d’auri ind’è noi. « Umbè ? Dice l’altru, induve sò, eiu ùn l’aghju visti issi soldi. » Quelli chì trovanu u bichjeru pienu (o ancu carcu), s’anu da lagnà dinù. « Peccatu !’ Hè dighjà compia a stagione » aspettendu ghjugnu 2017. Trà i cuntenti è l’altri, da cantu nostru o d’i turisti, l’affare scambia pocu. « Elli » voltanu in casa soia, noi dinù. Eletti, sculari, travagliadori, tuttu u mondu ripiglia a so strada. Ma ognunu cù un trafficu tamantu à u mondu. Una rientrata cum’è tutte l’altre. Cù scopu diferenti : « dix mois avant les prochaines » per i turisti, « ouf, semu ind’è noi », per certi corsi.


Eccu, i trail, e spassighjate in muntagne, a marina di settembre per noi soli, ci avemu da campà.
A dilla franca, i ghjorni s’anu da accurtà, u tempu abughjà, i cumerci chjosi, finite e canzone à e terazze di i caffè (micca da per tuttu !), hè a rientrata. Ripigliemu u nostru ritimu.
A dilla franca, ùn eranu cusì mali issi turisti…
A un altr’annu s’è Diu vole.