Corse Net Infos - Pure player corse

U "Rusignolu" s'invita à u Locu Teatrale in Aiacciu


Philippe Peraut le Dimanche 16 Juin 2019 à 18:18

Roccu Mambrini u famosu pueta di Zilia era prisente, cù una decina d'impruvisatori di l'associu di "chjami è rispondi" per una serata dedicata à un arte chì a particularità di a cultura corsa. Ma chì stà, arrimbatu à a lingua, in periculu...



Una serata dedicata à u "Chjami è rispondi", una di più, eccu ciò ch'elli prupunianu i respunsevuli di u Locu Teatrale, issu sabbatu in u so spaziu. Di fattu, sò parechji anni, chè Marianna è Mariu urganizeghjanu veghje intornu à iss'arte quì. Ma quella di stu sabbatu avia, di sicuru, un perfumu particulare. Cù a ghjunta, ancu s'ell ùn hè micca a prima volta, di u famosu "Rosignolu" di Zilia, Roccu Mambrini. Forse, u più anzianu à impruvisà!  "Aghju principiatu à trè anni à cantà, spiega, surisu in bocca, u pueta, mamma mi dicia "arresta di cantà, osinnò ùn ferai chè què di a to vita." A seguita, hè vera chè u pueta, chì hà festighjatu i so novantatrè anni, hà passatu guasgi a so vita à cantà è sulcà un arte chì si perde à pocu à pocu ancu s'è i ghjovani cercanu à ripiglià lu. Cusì, stu sabbatu, i so amichi di l'associu di "chjami è rispondi", avianu decisu di rendelu un orore cum'ellu si deve: Ghjuvan Petru Ristori (A Riventosa), Francescu Simeoni (Lozzi), Ghjaseppu Micaelli (Ghisoni), Paulu Calzarelli (Carticasi), Tittò Limongi (Tavagna), Paulu Santucci (Perelli), Paulu Franceschi (Frassettu), Stefanu Conca (Marignana) o Paulu Saveriu Luciani vinti anni, u più ghjovanu (Petralba). Uni pochi mancavanu (Parrigi, Savignoni, Salasca, Brandon Andreani) ma a serata hè stata un incantu. Prima, ghjè Ghjuvan Petru Ristori, prensidente di l'associu chì hà presintatu u Rusignolu: "U pueta strasordinariu n'aghju intesu parlà da un certu Mauriziu Acquaviva. Roccu hè sempre statu una referenza. Ogni ch'ellu ci era in qualchì locu, a sapiamu ch'ellu ci era qualcosa in più. A so voce hè calata appena ma hè sempre una maraviglia di sentela."
Altru umaggiu, di Rinatu Coti, sta volta ma intornu l'arte di u chjami è rispondi è a cultura populare. "Aghju intesu parlà di Roccu Mambrini nanzi di vedelu. Semi furtunati in Corsica, d'avè una cultura populari è un arti cum'è u chjami è rispondi più anzianu ch'è a pulifunia. U Rusignolu hè maestru, vali à dì, una parsona capaci di fà cuddà i so sculari à u niveddu u più altu."
Dopu à una bella cena (robba purcina, casgiu corsu, vinu, fritelli è appena dopu dui belli "Fraisiers" rigalati da david Mezzacqui), a serata hè principiata. Unu à unu, l'intervenanti anu rispostu à u Rusignolu chì, ellu lampò un primu, a "discursata". Avemu ritinutu a qualità puetica di tutti l'impruvisatori. In a sala, più di cinquanta parsone, à chì pigliava ritratti, à chì filmava, è prisenza di ghjente cunnisciuti cum'è Daniel Mezzacqui, Bernardu pazzoni o Antò è Larenza Tramini...A serata s'hè compia abbastanza tardi dopu à quattru ori d'impruvisata è, di tantu in tantu qualchì canzona. Prussimu appuntamentu, forse di lugliu in Villanova? Roccu Mambrini, falatu cù a so nipote, si n'hè vultatu in Zilia. Aspetta, avà, di ripiglià à cantà cù i so amichi...