Le communiqué
Una mudifica di u svulgimentu di e prove di i cuncorsi d’insignanti in lingua corsa hè stata messa in ballu stu 25 di ghjinnaghju. In duie parolle, s’agisce di un’inversione di i cueficcienti appiecati sin’à avà à e prove di u cuncorsu : vale à dì chì a prova di francese cù un cuefficiente 8 hà da valè à parte si di u 2022 u doppiu di quella di corsu chì ricivarà un cuefficiente 4.
S’ella tocca forse un’inseme di lingue rigiunale sta mudifica, e cunseguenze nant’à a pratica di una lingua corsa in difficultà in carrughju sò pessime è ùn si ponu accittà. Ramintemu ci ch’ella hè dighjà minurata ingrentu à u so ambiu naturale a lingua corsa per via di un ricusu di ricunniscenza ufficiale da u Statu. Sin’à avà, u locu di mantenimentu di a lingua capace di tuccà più ghjente- ancù di più cà l’associ- dipoi l’anni 80 era è hè a scola publica.
Ma s’ella s’appieca sta riforma, l’ore di lingua è cultura corsa inde i spartitempi di l’elevi saranu oramai cunsacrate à un fattu culturale più cà à l’amparera di una lingua postu chì l’insignanti saranu scelti sicondu a so maestria di u francese.
Si dice purtantu « persa a lingua, mortu u populu ».
Cusì hè fatta in tutti i duminii a dimustrazione di a vulintà di u guvernu Macron di fà ci smarisce cum’è populu.
Al dillà di sta voglia micidiale rinfurzata oghje più cà mai di pettu à u populu corsu, ci tocca dinò à cundannà a visione liberale di l’educazione ch’ellu porta stu guvernu.
Fighjendu bè a logica chì gestisce a riforma Blanquer di i cuncorsi prufessiunali cum’è di u mistieru d’insignante, s’avevde omu ch’elli ricercanu u ritornu di a bivalenza.
U scopu hè dunque di caccià i posti di quelli, numarosi babyboomers, chì si ne partenu à a ritirata è di fà tandu ecunumie à coste di a ghjuventù. Si pudarà esse à tempu prufessore di talianu è di francese, di storia è di francese o forse, di lingua corsa è di francese. È s’omu usserva, si rimarca chì ùn esiste micca l’agregazione di corsu ma un’agregazione in lingue di Francia.
Chì sarà s’omu lascia fà sta gestione cuntabile a sorte di l’educazione di sirviziu publicu ?
Una volta di più, si sceglie u prufittu è si sacrificheghja a qualità.
