Corse Net Infos - Pure player corse


Sedeci anni fà, smaria Natale Luciani


Maria-Serena Volpei-Aliotti le Samedi 7 Décembre 2019 à 13:22

Militante puliticu, di l'ombra è di u lume è militante culturale di u sempre, sinceru è fidu à e so idee, Natale Luciani, capu di u gruppu Canta u Populu Corsu, smaria di colpu, u 7 di dicembre 2003 in un accidente di a strada. Avia 54 anni.
Hà lasciatu daretu à ellu, tante canzone, tante musiche è tante cose chì anu permessu di mantene in parte, a Corsica.
Jean-Charles Papi, u s'amicu è cumpagnu di cantu, conta à CNI, quale era Natale.



Militante in u più prufondu di a so anima, Natale Luciani, unu di i fundadori principali di u gruppu Canta u Populu Corsu è di a Scola Di Cantu, era cunnisciutu cum'è una di e persone e più emblematiche di u riacquistu di u 70.
 
" Mi face qualcosa di vede issa Corsica ch’ùn hè più è di sente a voci di iss’omu tamantu di fede, di passione è di sincerità" principie Jean-Charles Papi, cantadore, amicu di Natale, dopu avè guardatu l'umaggiu resu in video à quellu omu. https://vimeo.com/27524735
 
 
" Un omu cusì strasurdinariu. 
L'omu militante avia un latu rigurosu di u militantismu ma avia dinò un'apertura di spiritu incridibile. Hà avutu mondu curagiu di dinuncià ciò chì ci vulia, quand'ellu l'hà fattu. 
Per mè, Natale hè u mudellu di u militante per a cultura è per a nazione. N'aghju vistu parlà, cuntà i so fattoni, ellu, hà sempre operatu di manera diversa ma stendu mudestu è discretu. 
Ùn s'hè mai avantatu di nulla.
Purtava tutt'a so sputichezza è a so andatura senza mai dilla. In veru mudellu d'impignamente cù nisun interessu persunale". 
 
Arristatu in u 1984, per attu di terrurismu, termine ricusatu da ellu, hè statu cundannatu à 7 anni di prigiò è trasferitu in prigiò di u cuntinente. 
Dop'à a so surtita, cinqu'anni dopu in u 89, avia decisu di rifurmà Canta u Populu Corsu, invitendu e voce di a giuventù. "M'anu dumandatu cù Petru Guelfucci d'integrà u gruppu quandu avia 20 anni. Aghju amparatu quì à cunnosce un omu cù qualità à tempu d'urganizazione è di travagliu manescu soprattuttu per a cultura. L'aghju vistu fà! Ghjera à so vita!"
 
Un musicantu, pueta, autore, cumpusitore eccezziunale, hà lasciatu à so marca. 
"Per me ghjè una di e sole persone ch'aghju vistu, avè una qualità musicale cusì varia. In generale, si cunnosce l'artistu basta ascultendu e meludie, cum'una sorte di ripetizione, s'assumiglianu tutte. Natale mi stunava ad ogni volte. Prupunia sempre meludie nove. 
Ghjera un meludistu chì sapia tuccà a ghjente. [...] A prima canzona chì mi vene in capu pinsendu à ellu ghjè "Sonniu". 
"Ghjera tuttu ellu. Un prufundezza d'impignimentu. È avia una fede in a Giuventù. Per ellu, ghjera cù a giuventù chì si pudia salvà a nostra corsa, a nostra lingua a nostra cultura è spirendu un lindumane più chjaru". 
Un autore più chè famosu chì sapia dinò tuccà à ghjente cù e so parole. " Dicia sempre ùn guardate micca i mo testi sò simpliciotti." Purtantu, canzone cum'è Missaghju, L'armata di L'Ombra, Allegria o ancu Campagnero è Militante, feranu sempre oghje cantà e generazione.
" Sè li pudia dì calcosa, sarebbe " Ti ringraziu per tuttu. Per, u to insignamentu, per ciò ch'avemu spartu è soprattuttu grazie per a to opera. Mudestamente, pruvemu à cuntinuà, senza pudè esse à u to livellu, u to travagliu, essendu e to sintinelle". 
Natale Ghjè dinò a "Scola di Cantu", fundata in u 1981 per trasmette a tradizione di u cantu è di a musica corsa à i più giovani. Parechji cantadori famosi d'oghje, anu amparatu à fianc'à u à ellu.
 
Natale Luciani hè smaritu di colpu u 7 di dicembre 2003, in un accidente di vittura. 
Una perdita tamanta per a Corsica, ch'ella sia per a cultura ma dinò per u mondu puliticu è a Giuventù. In mimoria à ellu, per a so famiglia.  


















    Aucun événement à cette date.



Newsletter


Galerie
Manif Ajaccio.12
Manif Ajaccio.11
Parking Gaudin
Parking Gaudin
Cinéma Ellipse
Cinéma Ellipse
IMG_9423
Donation Lazaret ajaccio.5
1
Inondations Ajaccio.17
Soignants Bastia
Hôpital Ajaccio
Inhumation Guy Bedos
IMG_9304
Citadelle Ajaccio.12
IMG_2047