Corse Net Infos - Pure player corse

Àrghjusta è Muricciu à l’ora di u Granu è di u pane


Vincenzu Marcelli le Dimanche 16 Septembre 2018 à 20:03

A l’occasione di e ghjurnate auropeane di u patrimoniu, è pè a terza edizione, a cumuna d’Arghjusta è Muricciu hà messu in vale, durante dui ghjorni, tuttu u sapè fà intornu à u n granu è u pane…



Sò avà trè anni ch’è Paul Jo Caitucoli hà sceltu d’arrimbà si nantu à e ghjurnate auropeane per mette à l’onore u patrimoniu è u sapè fà di u circondu. Cusì, è dopu à l’auroccu è a vigna, s’hè tratta issa dumenicata di u granu è u pane. Una cunferenza d’Hélène Paolini-Saez (LRA) hà datu rinsignamenti nantu à issu biadu da i tempi preistorichi sin’à d’oghje. Cù a direttrice di u Laboratoriu Regiunale d’Archeulugia, Fabien Gaveau, sturianu passiunatu da a Corsica è monda rinumatu, hà purtatu e so cunniscenze. « A cultura di i biadi era monda aduprata in Corsica. Masimu in u rughjone di u Taravu chì era un sulaghjolu à granu di tutti i paesi… »


Sparghje l’idea à l’altri paesi di u Taravu
Biadi, granu, tribbiera, farina, pane, nulla ùn n’hà mancatu per issa terza edizione. I farri di Mariu (stuvigli per tribbià), l’associu « u granu anticu » (spezie di biadi corsi), u pane cottu in u fornu di u quartieru Caitucoli, u granu hà tramandatu tutti i so sicreti à i più maiò ma dinò à i chjuchi. L’animazione diverse (spassighjate à VTT, à pedi, visite di u paese, rittrati) à mezu à u « marcatu di i pruduttori », « l’ortu di u cumunu » o i « canti di a terra è di l’omi » cù u gruppu « Pumonti » anu datu un aspettu abbastanza schiettu à issa manifestazione. Senza cuntà, dumenica, nantu à i Sardi ghjunti da u rughjone di Barbaggio per una cunferenza è una fabricanzione di pane sardu.
« Issa Manifestazioni, spiega u merre di a cumuna, hè stata da veru una riesciuta maiò. Era un mumentu di scambii, trasmissioni è spartera duranti dui ghjorni. Per noi, l’andatura hè di parmetta à l’aghjenti di a cumuna è d’altrò, di pudè campà in i paesi. Vali à dì, sviluppà, à pocu à pocu, sempri intornu issi tematichi, una dinamica ecunomica. Per quessu vulemi arrimbà ci à nantu à u mudellu sardu è sparghji issa manifestazioni in d’altri paesi… »
A terza edizione hà chjosu e so porte. S’aspetta avà sittembre u 2019. C’un’altra tematica…