Corse Net Infos - Pure player corse

Lotta contru à i fochi : una dumanda di dipositu di brivettu per l’Università


La rédaction le Mardi 25 Juin 2019 à 06:35

Dapoi una vintina d’anni, un gruppu di cercadori di l’Università di Corsica/CNRS face e ricerche
nant’à l’incendii. Hè stata dipusitata una dumanda di brivettu per un dispusitivu innuvante chì
permette di misurà cù a visione i flussi di calore spartuti da i fochi.



photo universite de corse cnrs 2
photo universite de corse cnrs 2

niziatu è messu in ballu à u laburatoriu Scenze Per l’Ambiente di l’Università di Corsica è di u CNRS, si busca digià u prugettu « Fochi » un’auturità à u livellu internaziunale. Dapoi guasi vinti anni, un gruppu d’universitarii face e ricerche in giru à l’incendii di vegetazione inde un dipartimentu dedicatu sanu sanu à st’attività nant’à u campus di Corti. U so scopu : capisce megliu i fenomeni chì intervenenu durante l’incendii è mudellizà li da pudè li anticipà è sviluppà arnesi innuvanti per luttà contru à l’incendii è accuncià u territoriu di pettu à sta prublematica prisente assai in Corsica.

Anu digià permessu issi travagli di sviluppà parechji arnesi numerichi di simulazione è d’anticipazione riguardu à l’evuluzione di i fochi. Oghje, si cuncentreghjanu i scentifichi di l’Università di Corsica / CNRS nant’à un altru aspettu di sta prublematica : a misura di l’irradiamentu termicu di l’incendii.

In fatti, anu messu in ballu i travagli per pudè sviluppà un dispusitivu otticu per misurà e caratteristiche geumetriche di un focu durante a so sparghjera (altura di e fiamme, surfazia è vulumu di u focu) è stimà à parte da sti dati u calore chì ghjè inghjennatu da l’incendiu. « Durante u so spiazzamentu, face affaccà un incendiu parechji flussi di calore chì danu indicazione à tempu nant’à a so putenza ma dinù nant’à u periculu, spieca Lucile Rossi, maestra di cunferenze à u laburatoriu Scenze Per l’Ambiente di l’Università di Corsica è rispunsevule scientifica di u prugettu « Fochi ».

I travagli scentifichi anu permessu di sviluppà strumenti di misura ottica è di flussi radiattivi chì ponu andà nant’à u terrenu, è di studià e rilazione trà u calore ricevutu nant’à una sibula è a forma di u focu ».

L’interessu di st’arnesi ? Per un dettu, deve permette stu dispusitivu à i spenghji fochi di valutà durante a lotta e distanze di securità per prutege si di e fiamme, è di adattà a quantità d’acqua per spenghje l’incendiu secondu e radiazione ch’ellu pò emette. In fatti, travaglianu dapoi un pezzu i scentifichi di l’Università di Corsica / CNRS nant’à sistemi chì permettenu di misurà e caratteristiche geumetriche di i fochi. D’altronde, sò, oghje ghjornu, i soli inde u mondu sanu à esse capaci à stimà u vulumu di un focu per via di un sistema otticu. Segnu chì sti travagli di ricerca sò ghjunti à maturità, hè statu francatu un passu maiò per a valurisazione di i risultati di ricerca. Hè stata dipusitata una dumanda di brivettu in u 2018 per ch’ellu sia ricunnisciutu stu dispusitivu innuvante creatu da i cercadori di u prugettu « Fochi », Frédéric Morandini, Xavier Silvani, Tom Toulouse è Lucile Rossi.

« Hè ricunnisciuta à u livellu mundiale a sperienza di l’Università di Corsica in quantu à a ricerca nant’à l’incendii di vegetazione, nota Margot Provost, incaricata di Trasferimentu di Tecnulugie per a SATT Sud-Est (Sucetà di Accelerazione di u Trasferimentu di Tecnulugie). Hè impurtante assai l’impattu sucetale di isse ricerche, postu ch’ellu tocca à a prutezzione di i bè è di e persone, è à tempu à i risichi naturali. Da stu puntu di vista, l’arnesi sviluppati à l’Università di Corsica sò veramente impurtanti chì si ne ponu ghjuvà i prufeziunali di a lotta contru à l’incendii ».

Inde u quadru di a so cullaburazione cù l’Università di Corsica, chì hè dinù azziunaria, travaglia a SATT Sud-Est cù u prugettu « Fochi » per sviluppà l’invenzione esciute da e so ricerche, è ch’elle sianu valurizate inde u mondu sucio-ecunomicu. Cuntribueghja a so azzione à rinfurzà a leia trà i cercadori è l’uperaziunali di a lotta contru à l’incendii in Corsica. Sò digià parechji anni ch’elli travaglianu inseme sti dui universi, soprattuttu per via di u pianu di prutezzione di a furesta è di i spazii naturali isulani (PPFENI).

À longu andà, vulerianu i capimachja di u prugettu « Fochi » di l’Università di Corsica ch’elli possinu esse utilizati da a sfera uperaziunale issi dispusitivi innuvanti di misura di i flussi di calore, è stallati nant’à i camiò di spenghji fochi o nant’à e zone di surveglienza per permette li di intervene megliu di pettu à l’incendii. Una manera di passà, à un livellu più largu, da a teuria à a pratica.