Viaghju immersivu per e seste bislingue di Calvi

L'elevi di sesta bislingua di Calvi anu participatu mentre 4 ghjorni à un bellu seghjornu in immersione lingua Corsa in Ghisoni.   U gruppu hè statu pigliatu in carica da l'Associu Scopre, gruppu d'accumpagandori in muntagna è di guide cunferenzieri, chì l'anu trasmessu i so sapè fà è cunniscenze parlenduli sempre in corsu.

" L'ubbiettivu pedagocicu di stu viaghju era anzituttu a scuperta di u micro-rughjone di Ghisoni. Anu participatu dinò à u prugettu di i cantieri giovani chì anu per scopu a riabilitazione di u patrimoniu storicu è culturale di u paese è i so circondi" spieche Francescu Luciani, u prufessore di corsu.

À u prugramma, pulizia di i chjassi, rinnuvazione di u ponte genuvese di Catani, scuperta è messa in statu di u Fussò, u canale d'irrigazione di u paese, pulizia d'un'aghja è spassighjata in u paese abandunnatu di Teppa.

"Mentre sti ghjorni, i zitelli, cù impegnu è vulintà, anu sappiutu pulisce, smachjà, cù attrazzi è ferri parechji siti di u rughjone è tocca è tira sempre parlendu corsu. Ringraziemu l'allogiu di u "Pianu" per a s'accolta, à "l'Associu Scopre" per u so inquadramentu senza paru".