Corse Net Infos - Pure player corse

Croneca : U Sporting « gattivu sughjettu »…


Antone Astima le Dimanche 25 Septembre 2016 à 00:47

U Sporting, a sapemu, hè u gattivu sughjettu di a Lega una dapoi anni è anni. Ogni ch’ellu si passa qualcosa nantu à un terrenu di Francia-è masimu in Corsica (si dice ch’ùn hè a Francia) -, i Bastiacci ùn sò tantu luntanu.



Croneca : U Sporting « gattivu sughjettu »…
Bagasci senza educazione, ancu s’ell’ùn ci sò, sò respunsevuli di qualcosa.
Ultima passata, stu pezzu di legnu (plasticu ùn si sà a dilla franca) ch’avaria toccu un capellu di Lucas, quellu s’appruntendu à stuccià un calciu d’angulu l’altra volta in Furiani.
U colpu saria, per contu meiu, di u Brasilianu, ch’ellu hè rasatu. U fattu hè chì ci hè vulsutu guasgi a squadra di « l’esperti di Miami » cù tutti i so arnesi (microscopi) camerà speciale è parechji anguli di vista per da a cunferma ch’è u sustenidore bastiacciu avia toccu u ghjucadore di u PSG.
Aaaa, aghju capitu, u PSG, chì pesa quantunque 450 millioni, basta à boccapandulà, starnutà, tussà o altri ch’è s’affaccanu tutti i media di u mondu sanu (francese…) ancu per ripruverà à un arbitru ch’avia lampatu u « pizzaiolu Cavani » fora : l’avemu visti, sò i Bastiacci. Scusate ma, era mi pare PSG-Lens.


Forse averanu vistu qualchì bandera o maglietta di u Sporting. Tandu, vultemu à i nostri Turchini : Penalty è rossu per Squilacci in cuppa di a Lega, amende à diritta è à manca, terrenu suspesu ùn sò quantu volte, è sin’à cuntà una fola (quella di Reims) ch’è mancu un zitellu di 5 anni ci credaria. Flasball à l’usu piottulu, gattivi sughjetti (tutti studienti), è avà 20 000 e d’amenda è a tribuna Petrignani chjosa contru à Guingamp.
Umbèh, avemu l’abitudine dicenu l’altri. A sapemu, semu « gattivi sughjetti ».
U PSG, ellu, hà pisatu u so indice è tuttu u mondu hè ghjuntu subbitu, subbitu. « Torna u Sporting ». Iè, calemu u capu, incasciemu e sintenze da a Lega (ghjusta). Ma, « ce qui ne tue pas rend plus fort » dice unu di « i so «  pruverbii.
Mentru ch’ellu ci serà un ghjucadore alzatu per purtà a bandera di e squadre corse, u stintu ùn si anderà…Tandu, 20 000 quì, 100 000 quallà, cartulina rossa è gialli, penalties ch’è nimu ùn hà vistu, pocu c’impremenu à noi.
Tè, mi ramenta un altru di i soi pruverbii : « quand on veut tuer son chien, on dit qu’il a la rage…
Noi, aspettemu. U Sporting 9mu di Lega una, ACA è GFCA in Lega 2, CAB in Naziunale, u tuttu per a populazione d’un quartieru di Marseglia. Ghjilosi ch’è vo site…