U cullettivu « Parlemu corsu » paliseghja a pusizione di Parrighji nantu à a riforma di u basciliè

Ùn eranu micca numarosi per colpu d’altre manifestazione, ma a voglia era quì. Purtata da u so capimachja Micheli Leccia, una vintena di membri o simpatizanti di u Cullettivu « Parlemu Corsu » s’era addunita issu mercuri dopu meziornu davanti à u Ritturatu di Corsica, in Aiacciu. Una cunferenza di stampa per palisà a riforma nova di i licei è masimu di u basciliè chì, secondu à u Cullettivu, mettenu l’insignamentu di a lingua corsa in periculu. « U scopu era sopratuttu d’incalcà nantu à u fattu chì a rivindicazioni chì devi essa purtata da tutti hè chì u corsu devi essa una disciplina com’è l’altri o ancu di più. Vali à dì ch’idda devi essa in u spartitempu di i sculari, imposta, senza circà à capì. Vulemu ch’edda finisca l’uzzioni. Basta l’uzzioni ! Oghji, u statu ci faci rinculà cù issa riforma. S’è no ùu riagimu micca, u prufissori di corsu finisciarà ancu par essa custrettu à insignà altri affari chè u corsu… »
Una manifestazione mutivata da e cunsequenze di u prugettu di legge Blanquer, di a riforma di u liceu è di u basciliè annantu à l’insignamentu bislinguu ind’u secondu gradu è l’altre lingue, dette « regiunale ». Di fattu, ind’un sistema induve i sculari sceglieranu da a seconda à a terminale trà specialità uzziunale, u corsu (coef à 0,6 à u basciliè) serà, di menu in menu insegnatu, d’una parte, è un’uzzione poca è micca scelta. Un insignamentu è una lingua in periculu…