A cunfraternita Sant'Antone ufficializata in Afà

Una cunfraternita in Afà, certi a sunniavanu dapoi qualchì tempu. D'altri l'anu fatta. À l'iniziu, c'eranu cantadori di messa per assicurà i mumenti maiò di a liturgia è, di sicuru, matrimonii, battesimi o intarri in Afà. À pocu à pocu, cù l'aiutu di dui Balanini chì cunniscianu a messa è chì eranu stallati sopra locu, una squadra nasce. È cù a ghjunta di Cristofanu Mondoloni, dighjà ellu stessu cunfratellu in Sartè, l'affare avanza abbastanza bè. "Avemu prima discutatu inseme, spiega Ghjuvan Andria Casamarta, oghje priore di a cunfraternita, eppo strada facendu, avemu cercatu, masimu cù l'aiutu di u prete Miniconi, à strutturà l'affare. Cusì, hè ghjunta l'idea di fà una cunfraternita è e d'esse prisenti, à fiancu à l'afaghjinchi à traversu tutti i mumenti di l'annata."
A squadra si struttura, s'acconcia, appronta i statuti è sceglie, di sicuru, u 13 di ghjugnu è a Sant'Antone, festa patrunale di u paese, per esse intrunizata. Per l'occasione, a ghjesgia era bella carca cù l'invitu d'una sessantina di cunfratelli ghjunti da paesi di u circondu è ancu più luntanu. I cunfratelli anu sceltu u verde , culore di u veranu, è l'agnellu, simbolu di i pastori bucugnanesi (Afà hè a piaghja di Bucugnà) per i so vestititi. "Per principià, ripiglia Ghjuvan Andria Casamarte, semu una quindicena per assicurà a liturgia è l'aiutu à a populazione afaghjinca, forse avemu da cresce à pocu à pocu."
Issu tredeci di ghjungnu, ghjè u vicariu Ghjuvan Iviu Coeroli chì hà celebratu a messa à cantu à Luois El Rahi, prete libanese è u diacru Francescu Amatu Arrighi, falatu specialmente da Vicu. Un primu passu per a nova cunfraternita, chjamata cù u sviluppu di u paese, è forse, i bisogni, à cresce...
Benvenuta!