Più di quindeci anni fà, a squadra di U Teatrinu, cumposta di cumediani, pà a piuparti avà ben cunnisciuti, surtiani una seria di medimetrami umoristichi, cumpletamenti scalati. Hè stata dinù l’epica di i primi passi di Tzek è Pidò à a televisiò.
Diffusatu nantu à France 3 Corsica à partesi da Dicembri di u 1995, « I Storti » hè statu assai bè ricevutu da a critica pupulari corsa. Duranti trè anni, Guy Cimino, Daniel Parigi (sparitu assai ghjovanu) è Dumè Gambini ani scrittu è missi in scena sei episodii, tanti più tonti l’unu cà l’altru, fatti di sketchs attempu in corsu, attempu in francesi. A macagna ci fù impiecata senza ritinuta, nè paura di u buffu, è ghjè què chì hà fattu di « I Storti » un’emissioni divertenti, drentu à a quali i telespettatori corsi si pudiani ritruvà.
Attualità pulitica, ballò, sucetà, tuttu ci hè passatu. Sei episodii di cinquanta minuti ognunu, u primu chjamendusi « Pourvu que les caoutchoucs tiennent ! », drenti i quali i cumediani si lampani nè parechji situazioni, da i falsi pubblicità pà una marca di capoti inglesi corsi, à una parudia di u Ghjurnali Televisatu, cù imitazioni di i prisentatori, cum’è Jacques Bastianesi (intarpritatu da Daniel Parigi). I pulitichi sò dinù piddati in derisioni, u tuttu cù una libertà di scrittura tutali, è un spiritu burlescu.
Eccu i dui primi episodii :
Episodiu 1 : “Pourvu que les caoutchoucs tiennent ! »http://www.youtube.com/watch?v=iDSuvzy1Di0&feature=g-u-u
Episodiu 2 : « Pourvu que les caoutchoucs tiennent, dans l’espace ! » http://www.youtube.com/watch?v=xbtdcB6Zvh0&feature=relmfu
Liviu CASTEL
Envoyer à un ami
Version imprimable
