I Santi : Santu Gavinu d'Irlanda, Santu Carlu Luanga

A legenda di San Gavinu hè magnifica. Contanu chì a so vita fù veradimente santa, à tal puntu chì, quand'ellu traversava una furesta, l'arburi li facianu riverenza, i leoni è i lupi si indinuchjavanu. I primi tempi di issa vita santa, Gavinu era statu sette anni arrittu, fermu, braccie sparte, senza manghjà, è pregava senza avvedesi chì l'ocelli venianu à fà i so nidi è à cuvà e so ove in e so mani.
Etimolugia : da u vechju gallese "gwalchmai" (falcu di piaghja).
Casate : Galvani, Gavini.
Nomi : Galvan, Galvano, Galvanu, Gauvain, Gauvin, Gauwe, Gavan, Gaven, Gavin, Gavino, Gavinu, Gawain, Gawen, Gouke,

Carlu Luanga è cumpagni, marturiati in u 1886 è u 1887, in l'Uganda, sò i primi martiri cristiani di l'Africa nera.
In u 1880, i Patri Bianchi volsenu evangelizà l'Uganda. U rè di issu paese i lasciò fà ma, u so successore, chì ghjera un marcante di schjavi, ùn l'intendia micca cusì. Un ghjornu chì i so schjavi cristianizati ricusonu di suddisfà i so vizii, i fece brusgià à picculu focu cù Carlu Luanga. Eranu 19. U papa Paulu Sestu l'hà canunizati in u 1964.
Etimolugia, casate è nomi : Cf Carlu Borromeo (4 nuvembre).
Retrouvez l'émission I Santi sur Voce Nustrale  du lundi au samedi à 10h30.