Dopu Cena : Storie è sinemà

Charles Monti le Dimanche 24 Mars 2019 à 19:40

À partesi d'oghje, Corse Net Infos, in cullaburazione cù l'Almanaccu di Bastia, apre una rubrica nova in lingua corsa : Dopu Cena. Una rubrica settimanale chì, vultendu indè u passatu, ci permetterà di rinvivisce legende, stalvatoghji è storie, opere di cuntadori lucali di Corsica chì cunteriamu, à u fucone, Dopu Cena è chì u cuntinutu sarà tiratu da l'Almanaccu di Bastia è u so circondu, premiu di u libru Corsu in u 2006 mà dinò appruvistatu da i nostri lettori di l'isula sana chì ci cunterianu in lingua corsa, legende, stalvatoghji è storie.

… U tempu passa ma brusgia sempre u focu di a tradizione (Dessin de Francis Stanzione)

E sale di sinemà anu pruduttu parechje situazione ridicule. L'annate 1950-1960 anu cunniscitu un'apugeu di e sale oscure.
A pupularisazione di a vittura individuale ùn essendu tantu sviluppata, Bastia a dumenica tinia i so abitanti, è i sinemà s'impiianu di spettattori.

Era dinò l'ore maiò di " La Réclame", duminata da Jean Mineur Publicité.
A mascotte di sta casa era simpliciamente un minadore. Apparia annant'à u screnu à a fine di a seria di pubblicità, lampavanu u so piccu in direzzione d'un bersaghju è culpia u centru d'induve surtia u numaru di telefonu di a sucietà Jean Mineur, annunciatu da un cummentu sulenne :JEAN MINEUR Balzac 0001.

Mentre u primu lanciamentu di stu filmettu, è à u numaru affilendi i zeri, unu spettatore à l'accentu caratteristicu di u Mercà di Pè, cummentò à alta voce :
"Ùn ti rendi micca contu, ancu un pocu ùn avia micca u téléphone ".