Corse Net Infos - Pure player corse

A morte in Corsica, usi è cridenze


J. L le Mardi 2 Novembre 2021 à 07:36

Secondu locu è ghjente, si porta omagiu à i so Morti, ognunu à so manera. In Corsica, unurà i Morti hè un usu religiosu seculare è si cunnoscenu parechji riti induve sacru è prufanu s’affiancanu.
Tony Fogacci, antrupulogu, prufessore d’Università, ci porta e so riflessione nant’à e cridenze è i riti ingiru à a morte.



(Foto CNI)
(Foto CNI)
Cumu a definite, voi, sta venerazione di i Morti in Corsica ?
Sò parechje e sucetà induve a morte hè un ritu, quellu di u passagiu trà dui mondi : quellu di i vivi, quellu di i Morti. Stu passagiu trà sti dui mondi hè cudificatu assai in Corsica è si traduce attraversu diversi riti. Sacru è prufanu sò vicinu assai, si diceria quasì una doppia religione. Un sincretisimu induve a religione catolica cù a so duttrina è e pratiche di i gruppi di persone venenu mischjati. U cultu di i Morti traduce un cuntrastu cù i morti chì si face attraversu riti prisenti nant’à tuttu u nostru territoriu. Stu cultu hè dinù una parolla adirrizzata à l’antenati, è u statutu d’antenatu hè impurtante assai ind’è noi. I ciculi di a nascità, di a vita è di a morte ùn si misculieghjanu micca, è a primura serà di compie un ciculu ; per un dettu : u maritu d’una donna incinta ùn pò purtà una cascia chì purteria a repetizione di a morte.
 
Qualessi eranu i riti praticati ?
Pè i Santi, ùn si sorte di notte trà u 1mu è u 2 di nuvembre chì hè u spaziu di i morti, da ùn cunfonde cù a Sant’Andria, quella notte i morti piglianu pusessu di u so spaziu intimu. In certi lochi, si lascia un piattu cù robba à manghjà nant’à u tavulinu, ma attenti ùn si lascia nè cultelli nè furcine chì u ferru pò ferisce i morti ! Pè d’altri, si mette un numeru sparu di candele nant’à e tombe. U Caracolu, hè u ballu di i morti, e donne girivoltanu ingiru à u mortu prusternendu si.
 
À puntu a piazza di e donne in sti riti
I primi interdetti di a Chjesa catolica toccanu di più e donne. Ramintemu ci quelle donne chì si strappavanu i capelli, sgriffiendu si a faccia o chì vuceravanu. Certe custituzione di veschi anu pruibitu ste pratiche dette pagane. « un peuple qui ne respecte pas les codes religieux surtout les femmes » disse un vescu. Pruibì, era u mezu di cuntrullà u territoriu religiosu. Cusì sò spariti una mansa di riti.
 
Chì ferma oghje di sti riti ?
Ùn s’hè micca persu tuttu, ma i riti anu pigliatu forme nove, per esempiu u « pranzu funebru » ùn si face più sott’à a so forma iniziale, ma pè un mortu si facenu sempre i ripasti in famiglia da adunisce si. Simu parechji ancu oghje à rientre si ne in casa dopu à un interru senza piantà indocu, si rispettanu i ciculi. A visita ch’è no puderiamu fà dopu à un interru seria risicà un doppiu interru. Sta nuzione hè prisente assai in u cultu di i morti, ci vole sempre à taglià u ciculu. In certi lochi, lascià u piattu cù robba à manghjà si face sempre è pè u 1mu di nuvembre si spalanca una finestra chì l’anime possinu vultà in casa soia.
 
È cù e rete suciale à chì ne simu ? passazione o… !?
Oghje, i giovani anu messu da cantu st’usi è riti anticogni ma à spessu si pò leghje nant’à e rete suciale « post » chì annunzianu a morte d’un certu tale cù parullucce d’affezzione. L’impettu di a sucetà di cunsumu hà mutatu i riti. Certe persone trasmettenu di manera cullettiva, preghere cum’è quella di « l’ochju » via e rete, d’astri segnanu u focu, via WhatsApp.. ùn sò più quelli riti o manere di fà di mammone ma sò sempre quì ancu si a trasmissione si face attraversu à u screnu. Campemu u prisente è pudemu ancu dì chì e rete suciale sò un novu modu di passazione !
 
O tempora, o mores ! 
J L





















Newsletter


Galerie
Manif Ajaccio.12
Manif Ajaccio.11
Parking Gaudin
Parking Gaudin
Cinéma Ellipse
Cinéma Ellipse
IMG_9423
Donation Lazaret ajaccio.5
1
Inondations Ajaccio.17
Soignants Bastia
Hôpital Ajaccio
Inhumation Guy Bedos
IMG_9304
Citadelle Ajaccio.12
IMG_2047