Madonna di Ficaghjola : procession jusqu'au lavoir

Ssu famosu evenimentu
Si passò l'ottu settembre
Ghjornu santu è benedettu
U ramenterremu sempre
In festa di Lavasina
A santa cusì vicina

Ind'u nostru lavatoghju
Chjamatu di Ficaghjola
e mamme vanu a lavà
cù nipote o cù figliola
fangotti belli imburatti
Ind'e pozze sbucinatti
Fora nant'a qualchi funa
si stendianu li panni
Lavoru senza misura
un si contanu l'affanni
U sole dà lu sò raggiu
a sse donne di curraggiu
A gallu un battulellu
un stecu è una fasciola
Era u più bellu battellu
Pè i ciucci dopu a scola
sciaquitendu a manu lesta
facenu nasce a timpesta
Ma un gran' trambulamentu
più forte che un terremotu
Ha lasciatu in un mumentu
a sciagura ind'e ssu locu
in ci hé più rise nè canti
mughji è stridi in tutti i canti
Da la ribba s'he stacatu
Un scogliu cusì tamantu
Nant'a rena s'he sbaccatu
È tuttu ciò in un lampu
ogni mamma cun paura
Cerca la sò criatura
E pò ritorna a calma
ognunu ritrova i sòi
ripiglianu le risate
s'abbraccianu i figlioli
U scogliu un fù maladettu
Chi ssu locu he benedettu
Tutti prighemmu a Santa
Ssù ghjornu miraculosu
Preganu cininu è babbu
prega a sposa cù u sò sposu
Pregannu mamma è figliola
A Madonna Di Ficaghjola