Corse Net Infos - Pure player corse

Croneca : Robba purcina è… robba purcina ?


Rédigé par Antone Astima le Jeudi 17 Novembre 2016 à 21:14 | Modifié le Jeudi 17 Novembre 2016 - 21:32


L’altru ghjornu, sò andatu ind’è u duttore ch’eru bellu malatu. Mi sintia u corpu. « Hè u fegadu », m’hà dettu quellu. A mè, m’hè ghjunta a paura ch’è dui ghjorni nanzu, aviu manghjatu una pulenta di quelle ind’u mo cuginu di Basterga (è micca Bastelica, vi spiegaraghju a prussima volta perchè…).


Croneca : Robba purcina è… robba purcina ?
E à mè, mi piace monda à manghjà lu crudu, u figatellu. Ma quandu aghju lettu u ghjurnale è vistu ch’è u figatellu pudia dà l’epatite C, a sapete iss’infimmazione di u fegadu chì vi pò tumbà à legne verde mi si parse di more.
Po, sò passatu d’un duttore à l’altru. Sempre cuntrariatu. « Hè un « psy » ch’è ti ci vole » m’hà dettu u mo amicu videndumi cusì male.
« A tè, ti face ride, aghju rispostu, ed eiu mi n’aghju da more, ch’aghju pigliatu l’epatite C, à più gattiva. »
A sapete ci ch’ellu mi risposse ?
« Ùn risicheghji nulla ! Ai pigliatu a tuntia è a « paurita »  !
Eiu, u fighjulava ride à più pudè. Tandu m’hà spiegatu ch’è i fegadi « periculosi » è avilinati eranu quelli manghjati crudi è fatti cù i porchi chì ghjunghjianu da fora. « Francia, di Slovenia, di Rumania, di…China ». Po, ùn la sapiu ch’è a i nostri porchi, li piacianu à viaghjà cusì !
« O scimò, m’hà dettu l’amicu (ancu assai ch’ellu ci hè), in Corsica ci sò trè spezie di robba purcina : quella fatta cù animali nati è alivati quì, chjamati i « nustrali ». Ghjè a robba paisana. Dopu, ci hè quella fatta cù porchi chì ghjunghjenu da u stranieru, tombi è tagliati quì, à l’usu corsu, ghjè a robba artisgianale. In fine, ci hè a robba purcina fatta cù porchi tombi in altrò è trasfurmati quì.”
Po, mi venia a pen’in capu à sente u mo amicu. Avà ci vole à fà Mathsup per manghjà un pezzu di figatellu !
Ma u mo amicu m’hà dettu ch’è u mo cuginu facia a robba purcina paisana. E di fattu, u figatelli avilinatu hè quellu fattu cù u robba « straniera ».
Un ci capiscu più nulla, à dilla franca. A sapete, aghju pigliatu un Efferalgan eppo sò andatu à un centru cummerciale à cumprà mi qualchì…cochonou !




Dans la même rubrique :
< >

Dimanche 11 Novembre 2018 - 19:48 In Belgudè, s'arricordanu di quellu ghjornu

Livres | Musique | Evènements | Lingua corsa | Cuisine